Die nuwe brandwag. Tydskrif vir kuns en lettere. Jaargang 1932

[p. 219]

Bekering.

(Horatius Carm. I. 34.)

My diens van gode, karig-min;

Onwyse wysheid was my leer;

Nou dryf die Nood die dwaler in,

En oor die weë van weleer

Kom t'rug die eens verlore seun.

Want Juppiter, wat ons verblind

Met vuur en deur die wolke dreun,

Het nou 'n donder-pad gevind

Dwars oor die helder hemel rein;

En Aarde stom, en swerwer-stroom

En al die Skimme in hul pyn

En seeë wat die Weste soom,

Skrik van die skok. Want mag het Hy

Om magtiges omlaag te bring;

Skril fladderend vlieg die Lot verby:

Een word verhef, sy maat verdring.

T.J. HAARHOFF.