Die nuwe brandwag. Tydskrif vir kuns en lettere. Jaargang 1932

[p. 166]

F.A.K.-Oproep aan Kunswedstrydvereniginge E.A. Belangstellendes.

ONLANGS het die F.A.K.-bestuur aangekondig dat hy in opdrag van die jongste Kultuurkongres 'n konferensie wil belê om sake i.v.m. kunswedstryde in die algemeen te bespreek en samewerking te bewerkstellig. Die konferensie sal op 19 Desember te Bloemfontein gehou word. Die F.A.K. doen 'n beroep op alle Kunswedstrydvereniginge en ander belangstellende organisasies om verteenwoordigers na hierdie belangrike samespreking te stuur. Laat elke Afrikaanse liggaam wat hom reeds vir voordrag- en ander kunswedstryde beywer of wat vanplan is om dit te doen, sy naam en adres aan die F.A.K.-sekretaries, Bus 3686, Johannesburg, stuur. As die F.A.K. so'n lys het, kan hy almal op hoogte van sake hou.

Op die Konferensie wil ons veral aanstuur op Interprovinsiale kunswedstryde, wat die Afrikaanse volk kultureel sal wakkerhou en voed tenspyte van ekonomiese en politieke skommelinge, net soos die Eisteddfod in Wallis en die Direachtes in Skotland.

Interprovinsiale Kunswedstryde, indien nie vandag nie, dan môre, of oormôre, of naasoormôre... maar ons wil vandag reeds begin!

Ons wil die weg voorberei vir ons groot jaarlikse of tweejaarlikse Suid-Afrikaanse Kunswedstryde deur bespreking van punte soos die volgende:

(a)	'n Basis vir die verdeling van ons Provinsies in distrikte, en die onderverdeling in kringe ens., met die oog op aanvanklike distriks-, provinsiale en eindelik interprovinsiale wedstryde.
(b)	Die mobilisasie van beoordelingskragte in die verskillende kringe, distrikte ens. met die oog op onderlinge hulp en uitruiling, die bevordering van 'n heilsame mate van eenvormigheid in die standaard en metode von beoordeling ens.
(c)	Onderlinge hulp by die opstel van 'n Kunswedstryd-program wat orals kan gevolg word, met die oog op minder of meer gesentraliseerde mededinging.
(d)	Gelyktydige kunswedstryde in al die distrikte met die oog op 'n sametrekking van kragte in daaropvolgende sentrale kompetisies.
(e)	Organisasiemiddele, finansiële reëlings, die toekenning van pryse, diplomas ens. by lokale of sentrale kunswedstryde.

[p. 167]

(f)	Distriks-, Provinsiale of Uniale beurse aan belowende kunskragte.
(g)	Ander punte wat van belang geag word.

Ons het hierbo net enkele puntjies genoem wat kan lei tot 'n vrugbare bespreking op die Konferensie. Maar die plan is nie om net te praat nie; ons wil oorgaan tot die daad, al is dit dan voorlopig nog die kleine, nederige, voorbereidende aanvangsdaad. Daarom wil ons van alle belangstellende Kunswedstryd- en ander vereniginge verteenwoordigers hê by die beraadslaging en by die opstel van ons konstitusie.

Moenie depressie pleit nie. Medeafrikaners, ons kan ryk wees in ons armoede. Ryk in die besit van 'n hart, wat die goeie vir ons volk en vaderland hartstogtelik wil. Ryk in geestesgoedere wat ons van ons Vadere geërf het, maar nog ryker in die kultuurbesittings wat ons self in die sweet van ons aanskyn verwerf.

Kultuur is karakter. En die Interprovinsiale Kunswedstryde is die aangewese middel om Afrikaners erfgename, waaragtige besitters van hulle eie kultuur te maak. Dan eers is hulle bestand teen gedurig wisselende tydsomstandighede.

Dis 'n moeilike taak wat ons nou aanpak; maar vir die Voortrekkerseun en -dogter wat hartstogtelik wil, bestaan die onmoontlike alleen in die drome van die papbroek.

Met hierdie woorde uit die hart verwelkom ons U by voorbaat reeds op die Bloemfonteinse Konferensie van 19 Desember 1932.

Bus 3686,

Johannesburg.

I.M. LOMBARD, Sekr. F.A.K.