Die nuwe brandwag. Tydskrif vir kuns en lettere. Jaargang 1932

In Knysna-Bos.

Hier in die oerwoud, in dié reuselaan -
Pilare van 'n kille katedraal,
Gegrondves in die afgrond, kolossaal,
Natuur se kerk, wat nimmer sal vergaan -
Hier, wyl die sagte strale van die maan
Deur lowerdak op grasperk-altaar daal
En wierookgeure uit die aandblom haal,
Wil ek aanbiddend voor die Meester staan.

God! Al-Skepper, Heerser, Oppergees!
Kon ek die indruk hou van hierdie uur,
Sou dit 'n rigsnoer vir die toekoms wees!
Maar nee, die blaking van so'n felle vuur
Is kragtiger as wat ek kan verduur:
Slegs Hyself kan Sy werk gedurig lees!

I.D. DU PLESSIS.