Die nuwe brandwag. Tydskrif vir kuns en lettere. Jaargang 1932

Geheime.

Verlang jou sluimerende siel ooit, see,
Om in die luister van die son jou hart
Te baai? En wens jy ooit om stil tevree
Te fluister van jou eensaamheid of smart?

Of sluit jy in jou groen gewelwe op
Al die geheime wat jou brand en skeur?
Is dit die wind net wat jou vlaktes beur,
En nie jou lewe wat so rusloos klop?

Ek weet net dit. - 'n Mensesiel kan smeek
Na lig in stom verlange, - en daar ween
In dieper dieptes as die stille see
Geheime, wat 'n hart kan stukkend breek -

As liefde klop! -
Skeur dan, o hart in twee,
Die las van liefde is veel te swaar vir een.

KLEINJAN.