Die nuwe brandwag. Tydskrif vir kuns en lettere. Jaargang 1932

Nag op die See.

Die boot plooi stil in die nag
die gladde vlak van die see,
en die skim van die donker land
reis soos 'n wag
heimsinnig mee;
en daar waar die water in skaduwee
sy blinkende afskeid laat,
is die hemel soos 'n see
met sterre gestraat.

O eindelose reis deur die sagte
geheiligde dom van die nag,
wat is by die oewers te wagte
van God se stralende dag?
Hoe lank duur die reis, hoe swerwe
ons nog deur die Ruimte, die Nag?
Die donker landskimme sterwe
en daar voor lê die kim ons en wag....

C.M. VAN DEN HEEVER