Die nuwe brandwag. Tydskrif vir kuns en lettere. Jaargang 1931

[p. 68]

Aan 'n Griekse Beeld.

As, soos oor 'n profeet van ouds, oor my

Die gees kon vaardig word

Sou ek aan jou die skoonste loflied wy: -
Dan sou daar van my lippe bleek wat bewe
As rakelings die gees daaroor kom swewe

'n Stroom van weelde stort.

Wit soos 'n skulp waarin gevoel'ge oog
Die skyn versin van flouste perlemoen -
Teer tinte van gevalle reënboog -
Wat sag die blankheid van jou wese soen
Kon duurste skatte ook jou skoonheid tooi,

'k Sou seldsaamste smarag,

Opale en saffiere om jou strooi,
'k Sou jou met brand- en wierookoffervrag

Vereer versteende prag.

Wie se volmaakte skoonheid stel jy voor?
Was dit van hom vir wie die Maangodin

Haar jaglus tem,

Haar honde strem,

Wat ongeduldig sidder op die spoor
Van speergekweste bok? Had sy die sin
Vir jou die wese van 'n sterweling
T' aanvaar, om jou na bosbegroeide kloof,
Waar droomdof skadu's oor 'n heil'ge kring
'n Purper skemering strooi, slaap-dronk te voer,
Om daar aan lippe deur jou droom verroer
'n Lewelose liefde te gevoel,

En te geniet...

Want oor haar moes Apollo silwer spoel

En strale skiet.

Miskien moes Eggo strafstom op jou wag,
Wanhopig oor jou koue skoonheid treur;
Van droefheid wegkwyn tot 'n louter klag
Wat antwoord as gilklanke rotse skeur.
Wyl jy oor blom-omringde waterplas

[p. 69]

 

Gebukkend hang, verstom

 

Oor wat jou helder waterspieël vas

 

Sluit in sy suiwer kom;

 

Jou eie beeld oor langs die plas se soom

 

Moes jy 'n narsing droom?

 

 

 

Het jy 'n magt'ge keiserhof betree

 

Gewilde gunsteling?

 

Moes jy die weelde ryker glorie gee

 

Van 'n weliusteling?

 

Hard het trompetgeskal jou koms begroet

 

En deur die donker slawe ry op ry

 

Het jy beweeg op trotse seker voet

 

Wyl elke oog gespan jou houding vlei?

 

Miskien ook was jou gees te vas geboei -

 

Jou diens had jou beskermer in beslag -

 

Miskien het ook 'n traan jou siel geskroei

 

Oor haar wat eensaam wag;

 

Strak het jou liefde ook jou oog laat straal

 

As op 'n hoë fees die keiser drink

 

Van jou die roosbestrooide wyn wil haal

 

Wyl jy eerbiedig aan sy voete sink;

 

Of moes jou vaardigheid op luit of lier

 

Sy heldedade vier?

 

Helaas, 'n vlamkrans moes jou liggaam vlei

 

Verganklik soos die gras,

 

En van jou skoonheid het daar oorgebly

 

'n Hopie as.

 

 

 

Genoeg, want jou geheim bly streng bewaar

 

Agter fyn lippe wat hartstogtlik krul;

 

Bevange lê 'n doodse stilte swaar

 

Om slape deur 'n lokke-goif omhul.

 

Maar altyd sal jou spiere jeugdig swel

 

Ferweelsag, buigsaam en soos staal so sterk,

 

Jou heupe om 'n seningband gestel -

 

'n Kunstenaar se werk.

 

Lange slanke lede af tot aan jou voet

 

Veredel soos 'n blom

 

Deur skoonheid waar jy nou voor boet

 

In marmer stom.

 

R.C. REYNOLDS.