Die nuwe brandwag. Tydskrif vir kuns en lettere. Jaargang 1931

[p. 26]

Die Oproep van die Heerskare.
(Homeros, H. II. 459.)

Kyk soos die vele geslagte

van voëls en gevleuelde diere,

Ganse en kraanvoëls en swane,

die swane met slank-lange halse

Daar in die Asiese weiveld

en rondom die stroom van Kaüstros

Rondfladder hier en daar ginds ook

en vreugdevol speel met hul vlerke,

Skree soos hul vorentoe aanspring,

en luid is die weiveld van klanke,

- Sò het die vele geslagte

gestroom van die skepe en hutte

Tot in Skamandros se vlakte

en vreeslik klink toe die aarde

Onder die voete van krygsman

wat aanloop en voete van perde.

Daar staan hul nou in die weiveld

die blomryke veld van Skamandros,

Tienmaal duisend so dig

as die blare, die blomme in lente.

Ja, en soos vele geslagte

van vlieë wat saampak soos wolke,

Hul wat die herder se stal

met hul drukte bedreig en tekeer gaan,

Vroeg in die voorjaar as melk

die boere se emmers bevogtig -

Sò dig staan teen die Trojers

Achajers met lokke langharig

Smagtende daar op die vlakte

hul vyand te skeur in hul woede.

[p. 27]

 

Hul, soos die herders van bokke

 

die dwalende kuddes gaan afskei

 

Ligtelik, as in die weiveld

 

hul vee in verwarring geraak het,

 

Sò het die leiers hul nou

 

in hul klompe en bendes gerangskik,

 

Klaar vir gevegte wat nader,

 

en onder hul skry Agamemnon

 

(Oë en hoof soos van Zeus

 

wat vaak hom verheug in die donder,

 

Middel, soos Ares so sterk

 

en sy bors soos diè van Poseidon).

 

Net soos 'n stier in die kudde

 

vèr uitsteek, vèr bo die ander,

 

- Almal wat wei in die veld

 

die moet wyk voor sy sterkte en glorie,

 

Sò het ook Zeus vir Atreides

 

laat lyk en begiftig met kragte

 

- Helde moes wyk vir sy glorie

 

die menigte lyk by hom nietig.

 

 

 

T.J. HAARHOFF.