Die nuwe brandwag. Tydskrif vir kuns en lettere. Jaargang 1930

Liefde en droom.

Die bosse sak weg in blouige lyn
teen die horison-halfmaan, 'n grou-groen skyn
kom skemer nou neer as die son sag sink
en die see se waterdak wemelend blink.

O bloeiende rose en kosmostuin,
as ek wandel hier oor skulp-wit duin
dan bring die seewind jul geure na my:
geen jare wat liefde en droom kan skei!

Is die tuin nou al dood, vergaan die bloei? - - -
Ver oor die see word 'n bootjie geroei;
dit verdwyn; maar blink is die groet
van golf op golf wat skuim aan my voet.

Moet alles so sterf? Die see is nou grys,
en die blouige bosse word swart; sag rys
die wind oor die wydheid, en 'n enkel meeu
skeer laag oor die water met wilde geskreeu.

C.M. VAN DEN HEEVER.