Die nuwe brandwag. Tydskrif vir kuns en lettere. Jaargang 1930

[p. 266]

Drie Oosterse Gedigte.

1. Die sjalimeer.

(Ali die handelaar bemin Aziza^*), lieflingsvrou van die Sultan.)

Ayesha^**) (Vriendin van Ali): -

Rooi soos die trane wat goue granate
Stort in die silwer Sjalimeer,
Rooi is haar lippe, en sag soos 'n roosblaar,
Sag is die lippe wat Ali begeer.

Vrouens van die Harem: -

Sag is haar lippe, maar sterk is die mure
En skerp is die staal van die Sultan Rameer!

Ayesha: -

Swart soos die donker fluweel wat die nag
Vou om die slapende Sjalimeer,
Swart is haar oë, en blink soos die sterre,
Blink is die oë wat Ali begeer.

Vrouens van die Harem: -

Blink is haar oë, maar hoog is die vensters
En diep is die grag van die Sultan Rameer!

Ayesha: -

Wit soos die lig wat die lotus weerspieël,
Diep in die hart van die Sjalimeer,
Wit is haar boesem, en skoon soos 'n blomkelk,
Skoon is die boesem wat Ali begeer.

Vrouens van die Harem: -

Skoon is haar boesem, maar fyn is die oë
En swart is die hart van die Sultan Rameer!

*) Spreek uit: Azieza (Arabies vir: My Geliefde).

**) Spreek uit: Aaisja.

[p. 267]

4.

 

Ayesha: -

 

Gragte en mure en swaarde verag hy,

 

Alles beswyk voor die hart wat begeer;

 

Braaf is die minnaar, en fier soos 'n strydros,

 

Fier is die minnaar wat doodstraf trotseer.

 

Vrouens van die Harem: -

 

Fier is die minnaar, maar wit die geraamtes

 

Wat skuif oor die sand van die Sjalimeer!

2. Die opaal.

(Vrouens van die Harem bewonder die Opaal in die swaard van Rameer.)

Ayesha: -

Kleurbranders eindeloos,
Diep uit opalehart,
Breek op die silwerrand
Van hierdie perlemoerstrand.

Vrouens: -

Talloos die tinte wat binne-in brand,
Skoon die opaal in die swaard van Rameer,
Kleurbranders eindeloos,
Diep uit opalehart,......
Rein die juweel in die swaard van Rameer!

Ayesha: -

Blou uit die see gesteel,
Rooi vlamme onderdeur,
Sag-groen en pêrel-grys,
Kleurlaag op kleurlaag verrys.

Vrouens: -

Rein die juweel in die swaard van Rameer,
Draer se luim word deur tinte bewys,
Blou uit die see gesteel,
Rooi vlamme onderdeur,
Skoon die opaal in die swaard van Rameer!

[p. 268]

3. Dood van Ali.

(Ali sing voor Aziza se venster en word deur Rameer beloer.)

Ali: -

Soet soos die klank van die dulsimer,
Soet is die lied van die nagtegaal,
Helderwit maanskyn en gloeiende rose,
Kyk hoe die Sjalimeer blink soos opaal!

Vrouens van die Harem: -

Rooi die opaal in die swaard van Rameer,
Rooi soos die bloed wat die Sultan begeer!

Ali: -

Sag soos die sterwende klank van die lier,
Klink nou die lied van die nagtegaal,
Kom, my geliefde, dis Ali wat fluister,
Brandend my hart soos die vuur in opaal!

Vrouens van die Harem: -

Vinnig verander die kleur van opaal,
Klaar is die lied van die nagtegaal,
Agter die goue granaatheining skuil hy
Hoog swaai die swaard, en rooi die opaal!

Ali: -

Sag ween die snaar van die dulsimer,
Soet snik die stem van die nagtegaal
Stil is die rose asof hulle luister
Kom, my geliefde, dis ek wat jou haal...

Vrouens van die Harem: -

Nooit klink die lied van die nagtegaal weer,
Rooi is die swaard van die Sultan Rameer!

I.D. DU PLESSIS.

[p. *40]

F.D. OERDER:
LANDSKAP.
(Stadshuis, Pretoria.)