Die nuwe brandwag. Tydskrif vir kuns en lettere. Jaargang 1930

[p. 117]

Liefde-Smart.

Nog nooit tevore is ek so geroer
om uiting aan my liefdesmart te gee
as nou, vandat jou oë bande smee
waarin jy my gevanklik weg kan voer.
Teen jou oorheersing het ek lank en stoer
gestry: 'n drenkling op die wye see
verkwis sy laaste krag om aan die wee
t' ontkom, wat uit die Dood sy grynslag loer.
Maar nou is ek oorwen; die heel dag droom
ek hoe ek wang en goue hare streel,
en later langsaam wegsink in 'n kus.
Totdat 'n ander ru gedagtestroom
my binnevloei: - ‘Vir jou nie dié juweel,
elders miskien, maar hier vind jy geen rus.’

U.J. CRONJE.