Die nuwe brandwag. Tydskrif vir kuns en lettere. Jaargang 1930

[p. 97]

Fugit Imago.

Lei my na salige eensaamheid,
gun vir my siel sy drometyd:
drome sal kom met die daeraadskyn,
skitterblank en soos douveld so rein,
drome lou en herinneringryk -
Skone, jou beeltenis wyk en wyk --!

Lei my na salige eensaamheid,
gun vir my siel sy vredetyd:
drome sal kom soos voorjaar se reën,
sag van gang met sy kruik vol seën,
drenkend my lande van dorre gedagte -
drome sal huppel deur blinkblye nagte.

Lei my na salige eensaamheid,
gun vir my siel sy vreugdetyd:
skatte van geure in somerse tuine,
elwe wat dans op perlemoer-duine,
skemer se sprake, so ryk, so ryk -
Skone, jou beeltenis wyk en wyk ---!

D.F. MALHERBE.