Die nuwe brandwag. Tydskrif vir kuns en lettere. Jaargang 1929

[p. 237]

Aan Hestella.

Kom nader, nader nog,
Leun aan my bors, my kind!
Die reën klets teen die ruite,
En hoor hoe huil die wind.

Laat blinkwit bliksemskigte
Die nag in repe sny;
Ek weet my God is êrens,
En jy is dig by my.

Ek word 'n klein, klein kindjie
As ek jou so omvou,
En dis of ek die sprokies
Van lang gelee onthou.
Ek sien die koningsdogter
Met Moses by die wal;
Ek hoor die beeste bulder
Om Jesus in die stal.

So! Nou's ek warm, liefste.
Ek sien my ouma weer,
En op haar wange gloei
'n Glimlag van die Heer.

Ek wonder of die sprokies
Weer eendag sal verdwyn?
Leun vaster teen my, liefste,
Ek is 'n kindjie klein.

EITEMAL.