Noordnederlandse Historiebijbel


[4] Op den dorden dach doe maecte haer Hester cyerlic toe mit twee maechden ende ghinc tot Asswerus. Ende Asswerus sat op sijn coninclike stoel. Ende doe hi die doer hoerde opdoen, doe sach hi mit wreden ogen. Doe was Hester vervaert ende viel in onmacht. Mer doe die coninc sach dattet sijn coninghinne was, doe boet hi haer sijn gulden roede tot enen teyken van vrientscappen. Ende doe custede si die roede. Doe seide die co\ninc:
[Folio 221vb]
"Hester, bidt wat gi begeert; ic selt u geven." Doe seide Hester: "Here coninc, ic bidde u dat gi ende Aman coemt mit mi eten." Doe seide Asswerus: "Het sel gescien." Doe quam Asswerus ende Aman ende aten mit der coninghinnen. Doe si gegeten hadden, doe seide die coninc: "Hester, bid nu wat gi wilt; het sel u gescien." Doe seide Hester: "Mer ic bid u dat gi ende Aman morgen oec mit mi wilt eten. Dan sel ic u mijn begeren seggen." Die coninc seide: "Hester, het sel di gescien." Doe Aman vandaen ghinc, doe was hi verblijt, omdat hem die eer gesciede boven al den anderen princen dat hi mit den coninc ende mitter coninginnen at. Ende doe hi verbi Merdocheus ghinc, doe en stont Merdocheus niet op, noch en eerde hem niet. Dat claechde Aman sinen vrienden dat die coninc hem eerde, mer dat Merdocheus hem niet en eerde. Doe seiden sijn vrienden: "Maect een galge binnen uwen hove ende raet den coninc dat men Merdocheus daeran hanghe." Ende des nachts dede Aman die galge binnen sinen hove maken ende meende Merdocheus daeran te hanghen.