Noordnederlandse Historiebijbel

[5]

Des nachts en mocht die coninc Asswerus niet slapen. Doe dede hi hem brengen dat boec van die Cornyken van den hove ende dede dat boec voir hem lesen.

[fol. 222ra]

Doe hoerde Asswerus lesen hoe dat Merdocheus den coninc gewaerscuwet hadde dat hem sijn camerlinghen vermoerden wouden. Doe vraechde die coninc wat eer dat Merdocheus daervoir gedaen was. Doe seiden sijn camerlingen: Hem en was daer geen eer voir gedaen. Des morgens doe was Aman vroech op ende ghinc totten coninc om hem te bidden of hi Mardocheus hangen most. Ende doe Aman voir Asswerus quam, doe vraechde hem Asswerus wat eer dat men hem doen soude die des conincs eer begheerde. Doe meende Aman dat hi dat wesen soude.

Daerom seide hi: "Men soude hem andoen des conincs mantel ende setten hem des conincs croen op sijn hoeft ende setten hem op des conincs ors. Ende die eerbaerste van sinen princen die soude dat orsse doer die stat leden ende ropen tot allen straten. `Aldus sel men dengenen eren die des conincs eer begheert.'" Doe seide die coninc Asswerus tot Aman: "Gaet ende doet dat al volcomelic als gi geseit hebt, ende leet gi selve dat paert. Ende doet dat Merdocheus, minen vrient. Ende en laet dat niet." Doe wort Merdocheus also versciert ende op des conincs orse geset. Ende Aman lede dat paert ende riep tot allen straten doer die stede: "Aldus sel men dengenen eren die des conincs

[fol. 222rb]

eer begheert." Mer Aman dede dat onwillichliken mit groten toorn.

Ende doe hijt gedaen hadde, doe ghinc hi thuuswaert ende claechdet sine vrienden hoe dat hi gevaren hadde. Ende doe quamen des conincs boden ende seiden tot Aman dat hi mit den coninc ter maeltijt soude comen.