Noordnederlandse Historiebijbel

[3]

Doe settede die Asswerus een prins, hiet Aman, dat hi dat lant onder hem regieren ende berechten soude. Ende die coninc gaf Aman sijn vingerlinc mede te zegelen ende te doen dat hi woude. Doe verhief hem Aman in hovaerdien ende geboet al den volc dat si haer knyen bugen souden, als si verbi hem ghinghen. Ende dat gemeen volc dede also als Aman geboden hadde. Mer als Merdocheus verbi hem ghinc, so en boech hi sijn knyen niet.

Doe Aman dat sach ende vernam, doe vraechde hi wat man dat dat was die sijn knyen voer hem niet en boech. Doe wort hem geseit dattet een jode was, want Merdocheus en woude sijn knyen voir nyement bugen dan voir den almachtige God. Doe benyde Aman die joden. Ende hi visierde enen raet hoe dat hi die joden mocht doen doden die daer noch int lant waren.

Doe ghinc Aman totten coninc Asswerus ende brocht hem een logentael an van den joden. Ende hi vercreech sinen wille dat men alle die joden doden soude die daer int lant waren.

Doe screef hi brieven in allen steden ende an alle die heren, dat men alle die joden vangen soude ende daerna doden. Doe die joden dat vernamen,

[fol. 221va]

doe waren si seer bedroeft. Ende si ghingen tot Mardocheus ende claechden hem dat. Doe ghinc Merdocheus tot Hester, sijnre nychten, der coninghinne, ende seide haer wat gebot dat Aman gegeven hadde over die joden. Ende hi bat haer dat si tot den coninc ghinge ende bade voir haer geslacht, opdat hi ende al haer geslacht niet ghedoot en worden. Doe seide Hester: "Het is 30 dagen geleden dat my die coninc niet en ontboet. Ende daer en moet nyement comen tot hem op sijn lijf, hien is ontboden." Doe seide Merdocheus: "Wie weet of God u daerom yet vercoren heeft, omdat gi sijn volc soud verbidden ende verlossen." Doe bat hem Hester dat hi die joden soude bidden dat si Gode voir haer baden ende vasteden 3 dagen. Ende die gemeen joden deden also.