Noordnederlandse Historiebijbel

[2]

Doe dede des conincs raet al dat lant ommesoken om die scoenste maechden tot des conincs hof te brengen die in sinen lande wa\ren.

[fol. 220vb]

Ende daer sout men een maget uut kyesen die alrescoenste waer. Ende dat genoechde den coninc wel.

Doe was daer in dat lant een man, genoemt Merdocheus, ende was gecomen van Benyamins geslacht ende was van den gevangen uut Judeen. Die hadde een brueders dochter, hiet Hester.

Die sende hi mede tot des conincs hove. Ende hi beval haer dat si niet seggen en soude dat si een joedinne waer. Ende Merdocheus die droemde enen wonderliken droem: hoe twee dieren vochten ende hoe dat een dier dat ander tenietmaecte ende verwan. Ende hi sach dat een cleyn fonteyn ontspranc ende die wort een groet vloet. Mer hi en wist niet wat dien droem beduden mocht.

Dese maget Hester die quam mede voir des conincs kamerlinc die die maechden in sijn bewaringe hadde. Ende doe die camerlinc Hester sach, doe docht si hem so scoen wesen boven die ander maechden, dat hem verwonderde. Doe gaf hi haer 7 maechden diese pareerden ende haer dienden. Ende doe worden si getoecht voir den coninc Asswerus. Ende Asswerus vercoes Hester boven al die maechden. Ende doe gaf haer die camerlinc voel maechden die haer dienden. Ende doe most men die maecht Hester een half jaer bestriken mit gageloly ende mit duerbaer specien, eer si tot den co\ninc

[fol. 221ra]

moste gaen.

Ende doe vercyerde haer die camerlinc mit costelike juweelen ende cyerheit ende brochtse doe voer den coninc Asswerus. Ende dat was opten tienden dach van loumaent. Ende doe gaf die coninc haer der coninghinnen croen ende hielt een maent die feest van der bruloft.

Ende Mardocheus die bleef bi sijnre nychten te hove ende was tot alre tijt in der salen. Ende die coninghinne Vasta die hadde nijt op den coninc Asswerus. Ende si overdroech mit twee van des conincs camerlingen dat si hem bi nacht in sijn bedde doden souden. Ende die twee camerlingen die spraken op een tijt tegader ende setteden in hoe dat si den coninc doden souden. Ende Mardocheus die hoerde dat ende ghinc tot sijnre nychten, der coninghinnen, ende seide haer wat hi van twee camerlingen gehoert hadde. Doe ghinc Hester totten coninc Asswerus ende si seide hem wat Merdocheus, haren oem, van twee camerlingen gehoert hadde: hoe dat si hem doden souden. Ende die coninc ondersocht dat ende vinc die twee camerlinghen ende vantet also als hem geseit was. Doe dede hi die twee camerlingen hangen. Ende hi dede dat in sijn memoriaelboec setten, dat Mardocheus hem gewaerscuwet hadde van die moert der camerlinghen. Ende doe geboet die coninc Asswerus dat nyement in sijn camer comen en most op sijn lijf,

[fol. 221rb]

hi en waer van hem ontboden.