Noordnederlandse Historiebijbel

Hier beghint dat boec van Asswerus, van Hester ende van Merdocheus

[1]

Asswerus was een machtich coninc van Percen ende van Meden ende van alle die lantscappen tusschen Yndien ende Etyopyen. Hi was here van hondert ende 27 provincien ende hi woende in die stat van Susa. In Asswerus dorde jaer doe hielt hi een hof ende een feest. Ende dat hof stont 100 ende 70 dagen. Ende dat hof hielt men in dat huys dat Danyel, die propheet, daer dede maken. Die calumpnen waren sulver, dat decsel was gedaen als den hemel ende daeran gewrocht menich wonderlic dier ende verciert mit gulden sterren. Ende buten der salen daer was een hof. Dat hiet dat Hof van Weelden. Daer was een wijngaert in gemaect. Die rancken waren sulveren, die bladen van goude, die druven costelike gesteenten, doirgaet ende tesamen gewrocht. Dat hof was al gepaveyt mit merbersteen. Ende al dat volc van der stat van Susen die mosten daer ten feeste comen. Ende men dranc daer al edelen wijn uut gulden vaten. Ende nyement en most

[fol. 220va]

den anderen noden te drinken, mer een ygelic dranc also voel, als hijs begeerde. Ende die coninghinne die hiet Vasta, die hadde mit alle den vrouwen een hof bisonder, daer si hoveerden.

Doe dat hof 7 dagen gestaen hadde, doe geboet Asswerus sijn coninghinne Vasta dat sy mit haren vrouwen tot sinen hove soude comen om die heren te verbliden ende haer scoenheit te besien.

Mer die coninghinne Vasta die versmade des conincs gebot ende en woude niet comen. Doe wort die coninc Asswerus toornich. Ende hi vraechde die 7 vruede die altoes bi hem waren, wat Vasta, die coninghinne, misdaen hadde, dat si sijn gebot overhorich was.

Doe was daer een die hiet Amycam, die seide: "Here coninc, sy en heeft u alleen niet misdaen, mer si heeft alle die heren ende alle die mannen van uwen lande misdaen, want alle die vrouwen die sellen an haer exempel nemen. Ende si en sellen haer mannen niet ontsien. Daerom, here coninc, setse van u ende neemt een ander scoen coninghinne. Die coninc Asswerus dede also. Hi dede Vasta verdriven uut sinen hove.