Noordnederlandse Historiebijbel

[3] Van Esdras

[fol. 219rb]

Artaxcerces wort coninc van Percen ende van Meden. Die paep Esdras die woende mit hem ende Neemyas was sijn scencker. Doe screef Esdras die wet Gods die Moyses eerst bescreven hadde. Oec screef hi den souter die David gemaect hadde ende ander prophecien die van den quaden Nabusardan verbarnt waren doe hi Jherusalem destrueerde ende verbarnde. Die screef Esdras weder overmits ingeven des heiligen Geests. Doe bad Esdras oerlof an den coninc Artaxcerces dat hi most varen te Jherusalem ende den joden die wet Gods leren. Die coninc gaf hem oerlof te trecken. Ende oec gaf hi hem brieven an die princen van Syrien, dat si sijn renten van coren, van wijn, van oly ende oec van gelde Esdras geven souden om den tempel te Jherusalem mede te vercyeren. Ende hi scaut alle die gevangen quijt ende geboetse weder in Judeen te varen. Doe toech Esdras in Assyrien tot die joden die Salmanaser gevangen hadde int lant van Ysrahel, die in dat gebercht van Caspya woenden. Esdras bat hem dat si mede in Judeen wouden varen, mer van die 10 geslachten die daer gevangen waren, so en volchden hem niet meer dan 50.000, 800

[fol. 219va]

ende 20 mannen. Die brocht Esdras int lant van Judeen. Ende doe togen si te Jherusalem ende deden daer haer offerhande.

Ende doe vernam Esdras dat die joden veel an heydense wiven gehilict waren. Die sceide hi al van malcander. Ende hi leerde hem ende predicte hem dat si die wet Gods ende die geboden Gods houden souden.

Doe woende Nemyas, een jode, mit den coninc Artaxcerces ende hi vernam dat Jherusalem niet bemuert en was. Hi bat oerlof an den coninc om Jherusalem, die stede, te bemueren. Die coninc gaf hem oerlof. Doe toech Nemyas doer dat lant van Babylonyen ende nam voel van den joden mit hem ende brochtse in Judeen. Ende doe dede Nemyas die stede van Jherusalem bemueren. Mer dat benyden die van Syrien ende ander landen die daeromme saten, sodat si mit vechten ende mit striden twee jaer daerover wrochten.

Doet volmaect was, doe deden si Gode sacrifici ende offerhande. Mer si en hadden dat heilige vuer niet daer men die offerhande mede ontstac. Want doe men die joden vinc ende in Babylonien voerde, doe nam Yeremyas dat heilige vuer ende dalft int Dal van Josaphat. Doe ghingen die priesteren mit processien

[fol. 219vb]

int Dal van Josaphat. Ende si vonden den Put van der gracien Gods. Ende oec vonden si die kolen leggen in vet water. Si namen die kolen ende leydense op dat outaer ende die offerhande daerop. Ende van der gracien Gods so ontfuncten die kolen die meer dan 100 jaer daer begraven hadden geweest. Ende die offerhande ontstac ende barnde. Doe dancten ende loefden die priesteren Gode mit al den gemenen volc, omdat Hi hem die gracie dede. Doe predicte ende leerde Esdras den joden die 10 geboden Gods ende oec mede die wet Gods. Mer hi en condese mit predicken niet brengen van haer gewoenten, want opten sabboth - dat was opten heiligen dach - so plach dat volc van buten altoes te comen in Jherusalem mit hoenren, mit vogelen, mit wijn, mit druven ende mit ander froeyt te vercopen. Ende die van binnen die coftent. Mer wat Esdras hem predicte ende beruspede, si en woudent niet laten. An Jherusalem daer waren doe 8 poerten. Die dede die paep Esdras op den heiligen dach alle sluten. Ende op elke poert daer sette hi twee mannen. Als die luden van buten mit guede quamen om te vercopen ende niet in die stede en mochten, so spraken die mannen van der poerten ende seiden: "Men moet opten heiligen dach niet copen noch vercopen, mer coemt morgen, of overmorgen of in die weeck:

[fol. 220ra]

men sel u dan guet besceit doen." Aldus wende Esdras die joden van Jherusalem ende oec van buten Jherusalem, sodat si den heiligen dach vierden.

Die stat van Jherusalem en was noch niet wel bewoent. Doe dede Nemyas voel volcs mit bidden in die stede comen wonen. Ende oec dede hi voel volcs mit kavelen daerin comen wonen. Daerna doe starf Nemyas ende wort in Jherusalem begraven. Doe Artaxcerces doot was, doe wort Cerces, sijn soen, coninc van Percen ende van Meden ende regierde mer twee maenden. Daerna wort Segdonus coninc van Meden ende van Percen ende regierde 7 maenden. Daerna wort Darius Notus coninc van Percen ende van Meden. Ende hi verloes Egipten. Ende in die tijt regneerde Ypocras, die die const van der visiken vant. Ende in die tijt wort Plato geboren, die daerna Aristotiles meester was. Ende na Darius Notus so wort Asswerus coninc van Percen ende van Meden ende van meer conincriken.

Explicit Esdras.

Et sic est finis, sit laus et gloria Trinis.

Hoc opus exegi, Cristo sit gloria Regi.

Hierna volget van Hester.

[fol. 220rb]