Noordnederlandse Historiebijbel

[2] Hoe Darius coninc wort

Die seven heren, die doe des conincs dochter Panteyge te bewaren hadden, die overdrogen mit malcander ende scicten enen dach dat si op ene ure gelijc te hove souden comen. Ende als si

[fol. 218rb]

in dat hof bi malcander waren, wes paert dat eerst neyde, die soude Panteyge, des conincs dochter, hebben ende coninc wesen. Ende op dien dach dat die heren te hove souden comen, doe dede Darius stalmeester Darius orse een merry bespringen. Ende des morgens doe si te hove quamen, doe neyde Darius ors eerst. Ende doe nam Darius Panteyge tot enen wive ende wort een machtich coninc van Percen ende van Meden.

Sorobabel, Zacharias ende Aggeus die deden an den tempel tymmeren. Doe quamen die princen van Syryen ende verboden hem dat werc te maken, ten waer dat si oerlof hadden van den coninc. Doe toech Sorobabel weder tot den coninc Darius ende wort van al sijn gesin wel ontfangen, want hi in sijn joecht mit Darius gewoent hadde. Des nachts was coninc Darius so wee, sodat hi niet slapen en mocht. Ende hem quam een saec in den syn, sodat hi docht welc dat stercste ende machtichste was van desen drien: weder die coninc, of die wijn, of dat wijf. Ende des morgens doe sijn gesyn bi hem quam, doe openbaerde hi hem dat ende seide: So wie hem dat mit reden bewijsde, welc dat stercste ende machtichste was, die soude hi grote giften geven. Doe

[fol. 218va]

quam daer een ende seide dat die coninc die stercste ende machtichste was. "Want die mensche heeft macht over allen creaturen in der aerden. Ende die coninc is here over die menschen ende oec over die creaturen." Doe was daer een ander. Die prijsde die wijn ende seide: "Dat die coninc die menschen dwinget ende dat si hem ontsien, dat doet den syn die die coninc heeft ende den syn die die menschen hebben. Ende die wijn dwinget des conincs syn ende des menschen syn, dat hi niet en weet ende men den coninc niet en ontsiet." Doe seide Sorobabel: "Dat wijf is mogender ende sterker dan die coninc of den wijn, want dat wijf draecht den coninc in haer lichaem ende brenct hem ter werelt. Ende si voet den coninc. Ende oec draecht dat wijf dengenen die die wijn plant ende wint ende si gift hem voetsel. Ende oec so set die man sijn lijf voir dat wijf." Oec seide Sorobabel: "Het was eens eens conincs amye. Die sloech den coninc an sijn een wange ende an sijn ander wange. Ende hi verdroecht haer al. Was dat wijf drovich, die coninc was drovich. Ende was dat wijf frolic, die coninc was frolic." Doe seide noch Sorobabel: "Bovenal is die waerheit stercste, want die waerheit en verkeert

[fol. 218vb]

niet ende sel ewich dueren, want God is waerheit, diet al regiert ende maect." Doe volchden hem al die heren ende seiden dat Sorobabel die waerheit seide. Doe hiet coninc Darius Sorobabel eyschen ende seide: Wat hi begheerde, hi soudet hem geven. Doe bat Sorobabel dat hi oerlof woude geven den tempel te Jherusalem weder te maken ende dat hi die heilige vaten des tempels daer wederseinde. Doe was Darius, die coninc, verblijt, omdat Sorobabel hem sijn beloft halp hogen, want hi hadde geloeft: Worde hi coninc, dat hi dat doen soude. Doe gaf coninc Darius Sorobabel brieven an die princen van Syrien, dat si niet hinderen en souden den tempel te Jherusalem te maken. Mer hi geboet hem dat si daertoe helpen souden ende dat si hem die renten geven souden van coren, van wijn ende van oly, dat den coninc toehoerde. Ende so wie daer jegen dede ende dat niet en volbrocht, die verboerde lijf ende guet.

Oec so gaf coninc Darius Sorobabel al die gulden vaten ons Heren, die in den tempel hoerden. Ende hi bat hem dat hi voer hem ende voir sijn kinder bidden soude. Doe toech Sorobabel te Jherusalem waert doer Caldeen ende nam mit hem die joden die daerin waren ende mede wouden. Ende hi brochtse te Jherusalem.

Doe begonden die joden te wercken an den tempel in coninc Darius anderde jaer. Ende doe wort die tempel volmaect na der figue\ren

[fol. 219ra]

van Salomons tempel binnen 7 jaren. Mer dat coninc Tyrus eerst oerlof gaf dat men den tempel maken soude, dat was nu geleden 46 jaer. Ende doe starf die propheet Aggeus ende wort begraven in Jherusalem.

Doe den tempel volmaect was, doe wort hi gewiet opten 28sten dach van maert. Ende doe hielden si Paeschen na die wet. Ende si setteden een arc in den tempel in Sancta sanctorum. Mer ten was die arck niet die Moyses maecte mer een ander. Ende doe starf Sacharias ende hi wort bi Aggeus begraven. Ende in die tijt doe verloes coninc Darius dat lant van Egipten, dat Cambises gewonnen hadde. Ende corts daerna doe sterf coninc Darius.

Ende Cerces, sijn zoen, die wort coninc na hem van Percen ende van Meden. Ende in die tijt sterf Pictagoras die dat rechte musijck vant. Ende oec ordineerde hi ende vant die clocken ende menigherhande manyer van snaerspul.

Cerces die was coninc van Percen ende van Meden. Hi wan Egipten weder mit craft, dat sijn vader verloren hadde. Doe was in Jherusalem een biscop, die hiet Elyachim. Ende hi was biscop over al Judeen. Ende na die tijt wort Jherusalem geregiert van biscoppen.

Na Cerces wort Artabanus coninc van Percen ende van Meden. Ende hi en regierde niet meer dan seven maenden. In die tijt wort Socrates geboren. Daerna wort Artaxcerces coninc van Percen ende van Meden.