Noordnederlandse Historiebijbel

[12] Hoe Darius ende Tyrus die joden oerlof gaven te Jherusalem te varen

Doe coninc Darius ende coninc Tyrus Babylonyen ende al dat lant gewonnen hadden, doe gedocht

[fol. 214vb]

Danyel dat hi omtrent 70 jaer aldaer int lant geweest hadde, als Jeremyas voirsproken hadde. Ende Danyel die bat an Gode dat Hi Darius ende Tyrus alsulken sin moste verlenen, dat si alle die joden oerlof gaven weder te lande te varen. Doe gaf God Danyel te kennen dat sijn gebet verhoert was. Doe bat Danyel an coninc Darius ende an coninc Tyrus dat si die joden oerlof wouden geven weder te lande te varen. Darius ende Tyrus die gaven alle die joden oerlof weder in Judeen te varen. Ende daertoe gaven si hem alle die vriheden die si in haren lande hadden, eer si gevangen worden. Doe Danyel den joden dat openbaerde, doe en was daer nyement die weder in Judeen wouden wesen, want die oude die waren meest al doot ende die jongen waren meest daer int lant geboren ende hadden grote rijcheit vergadert, als lant, huys ende ackeren. Ende dat en lieten si nyet gaerne after. Aldus vant er Daniel luttel die willich waren mit hem te trecken. Doe was Danyel bedroeft ende vastede 21 dagen ende dede penitenci ende bat Gode dat hi den joden den syn verleende dat si te Jherusalem geerden te trecken. Doe lietet hem God weten dattet corts gescien soude. Ende binnen die tijt doe starf Darius. Doe was Tyrus coninc van Percen ende van Meden.

Die coninc Ty\rus

[fol. 215ra]

die hoerde op een tijt een prophecie dat Ysayas gepropheteert hadde: dat den tempel te Jherusalem onder den coninc Tyrus weder begonnen soude worden te maken. Doe screef coninc Tyrus enen brief ende sende die overal in sinen lande: dat hi alle die joden oerlof gaf vry te varen weder in Judeen ende haren tempel weder te maken. Doe waren daer somme van Judas geslacht, als Sacharias, Salatiel, Sorobabel ende Aggeus. Dese spraken die oude ende die jonge ende si baden hem dat si mit hem te lande wouden varen. Ende dat was in Tyrus eerste jaer dat hi machtich coninc was. Danyel was diegene die die reyse eerst began, mit Sacharias, Esdras, Salatyel, Sorobabel ende Aggeus. Mer hi sterf, eer si reysden ende hi wort in Susa begraven bi die coningen. Doe die joden tesamen gesproken hadden om thuyswaert te reysen, doe hadden si vergadert van Judas geslacht, van Benyamins geslacht, van die levyten omtrent 50.000 mannen die willich waren. Doe gaf hem Tyrus scat ende guet den tempel mede te maken. Ende hi gaf hem mede een deel van die heilige vaten die Nabugodonosor uut den tempel genomen hadde. Ende dat was in Tyrus dorde jaer.

Doe togen die joden also te Jherusalem waert. Ende doe si te Jherusalem qua\men,

[fol. 215rb]

doe vonden si alle die steden ende dat lant gedestrueert ende woest. Ende dat eerste dat si maecten, dat was dat outaer Gods. Ende daer offerden si Gode offerhande ende dancten ende loefden Gode van die graci die hem gesciet was. Ende doe begonden si dat fondament van den tempel weder te maken. Ende doet boven der aerden was, doe songen si den lofsanc ende dancten ende loefden Gode. Mer die oude die Salomons tempel gesien hadden, die screyden, doe si dochten om die grote cyerheit des tempels. Doe die joden aldus den tempel te Jherusalem weder begonden te maken, dat benyden die van Syryen ende van Samarien die daer heren int lant waren ende en wouden niet ghehengen dat men den tempel weder opmaecte. Also bleef den tempel leggen, dat men in 30 jaren niet hoger en maecte, dan dat men op die mueren lenen mocht. Ende coninc Tyrus begeerde den tempel helpen te maken, mer hi oerlochde altoes, sodat hi niet en wiste dat men an den tempel niet en maecte.