Noordnederlandse Historiebijbel

[11]

Die coninc Darius die voerde Danyel in Meden mit hem. Ende hi maecte hem sinen hoechsten raet. Dat benyden die ander heren ende si dochten hoe si Daniel mochten begripen in enigen dingen, mer si en vonden in hem geen saec. Doe ordineerden die heren een dinc ende brochten dat den coninc an, dat men in dortich dagen nyement en soude anbeden dan alleen den coninc Darius. Ende so wie daerof bevonden wort, die soude men in der leeuwen put worpen. Doe geboet Darius, die coninc van Meden, dat nyement en soude geen goden anbeden dan alleen den coninc Darius

[fol. 214rb]

binnen 30 dagen op sijn lijf.

Doe ghinc Daniel in sijn huys ende ontdede een veynster te Jherusalem waert. Ende hi anbede den almachtigen God driewerven des dages op sine knyen. Ende die heren die hem benyden, die wachteden dat ende wroechden dat voir den coninc ende seiden dat Danyel des conincs gebot gebroken hadde. Die coninc hadde Daniel lief ende woude hem ontsculdigen ende quijt laten. Mer die gemeen heren seiden: Men moste des conincs gebot houden. Ende die heren namen Danyel ende worpen hem in den put onder die leeuwen.

Des nachts en sliep die coninc niet van rouwen, omdat hi Danyel quijt was. Ende des morghes was hi vroech op ende ghinc bedroeft totter lewen put ende seide: "Knecht Gods, mocht dijn God u niet bewaren voer der leeuwen monde." Doe andwoerde Danyel ende seide: "God die heeft sinen engel alhier gesent die der leeuwen monde heeft besloten, dat si mi niet misdaen en hebben, want ic ontsculdich ben van misdoen." Doe dede die coninc Danyel uut den put doen ende was ongequest. Doe seiden die heren die hem

[fol. 214va]

gewroecht hadden, ten was van sinen God niet dat hi ongequest was. Mer si seiden dat die leeuwen geen honger en hadden. Doe dede die coninc alle die heren die Danyel gewroecht hadden, in den put worpen mit al horen wiven ende kinderen. Ende si versaden die lewen. Ende si waren alle in corter tijt verscoert ende gedoot.

Doe geboet coninc Darius in alle sine lande ende screef daer brieven, dat men Danyels God soude anbeden. "Want Hi is die God, die Here, die ewelic leven sel."

Doe maecte Daniel in die stat van Susa een huus dat noch staet. Ende daer graeft men in die coninghen van Persen ende van Meden. Ende so wie dat huys huden des dages siet, die dunct dattet vluchs gemaect is. Danyel gaf een teyken ende propheteerde ende seide: "Als die bergen an die noertzide beghinnen te roken van Babylonien, so sel die stat van Babylonien gedestrueert worden ende verderft. Ende als dat eynde der werelt comt, so sellen die bergen beghinnen te barnen."