Noordnederlandse Historiebijbel

[2]

Nabugodonosor die droemde op eenre nacht. Ende des morgens hadde hi den droem vergeten. Doe ontboet hi sijn meesters, dat si hem seggen souden wat hem gedroemt was. Doe seiden die meesters: "Segt

[fol. 208va]

ons den droem, so mogen wi u dan exponeren." Doe seide die coninc, dien droem was hem vergeten. Doe seiden die meesters: "Hi en leeft niet die u seggen sel wat u ghedroemt is."

Doe ontboet die coninc Daniel, dat hi hem seggen soude wat hem gedroemt was, of hi soude hem ende alle sijn meesteren doen doden. Doe bat Daniel vorst tot morgen toe. Ende die coninc gaf hem vorst tot morgen. Doe ghinc Daniel thuys ende bat mit sinen gesellen dat hem God te kennen woude geven wat hem gedroemt was. Ende God gaf Daniel den droem te kennen ende oec mede die bedudenisse. Des morgens ghinc Daniel tot den coninc ende seide: "Here coninc, gi docht in u selven wie u conincrijc na u besitten soude. Doe openbaerde u God enen droem. Ju docht dat gi saecht een beelde dat was sijn hoeft gouden, die borst ende armen sulveren, die buyc coperen, die benen yseren ende die voeten aerden. Ende doe viel daer een steen, sonder mans hant gehouden, van boven neder op dat beelde ende brac dat beelde an stucken ende maectet teniet. Ende dien steen wort een groet berch. Siet, dat was den droem. Mer, here coninc, ho\ret

[fol. 208vb]

die bedudenisse. Gi sijt dat hoeft van den beelde dat gouden is. Na u sel comen dat rijc van Azien; dat is die borst van sulver ende die armen; dat is Persen ende Meden. Ende daerna was die buyc coperen; dat is dat rijc van Alexander. Want dat coper dat clijnct verre, also was Alexanders rijc verre vermaert. Daerna waren die benen yseren; dat is dat Roemsche Rijc. Dat is dat stercste. Daerna waren die voeten aerden; dat waren voel ander riken die dat Roemsche Rijc anstreden, mer si worden tenietgemaect. Die steen die op dat beelde viel, sonder mans hant gehouden, dat is Jhesus, die van den hemel quam ende wort van die reyne maget Maria geboren ende vervolde al aertrijc mitten kersten geloven. Ende die steen Jhesus die is verheven boven alle geberchten int ewighe leven."

Doe Danyel den droem aldus beduyt hadde, doe viel die coninc op sine knyen ende seide: "Voirwaer, u God is God boven allen goden." Doe gaf die coninc Daniel macht boven alle sinen heren die stat van Babilonyen te regieren. Ende die 3 kinderen, Sydrac, Mysaac ende Abdenago, die gaf hi macht buten Babylonien dat lant te regieren. Ende si hielden den joden daertoe, dat si die geboden Gods hielden, als God geboden hadde.