Noordnederlandse Historiebijbel

[8]

Ende daerna leiden si den jongelinc tot haer. Ende Thobias die docht die woerden des engels ende nam uut sinen aesac een stuc van der lever ende leidet op barnende colen. Doe greep Raphael, die engel, den duvel ende banten in die hoge woestijn van Egipten.

Ende doe troeste Tobias die maecht ende seide: "Sara, staet op ende laet ons Gode benedien, huden, morgen ende overmorgen, want dese 3 nachten moeten wi Gode dienen mit onsen gebede. Ende daerna so sellen wi in onsen huwelic sijn. Want wi sijn kinderen der heiligen, daerom en sellen wi niet vergaderen als die heydenen die God niet en kennen." Doe ghingen si beide in haer gebede. Ende si baden

[fol. 202rb]

an Gode ynnichliken, dat hi hoer beider salicheit woude verlenen. Ende Thobias seide dus tot Gode: "Here God, onse Vader, die in den hemel is ende in der aerden, ende al dat daerin is, moet u gebenedien, ende die zee ende die fonteynen ende die rivyeren ende alle die daerin sijn. Gi maecte Adam van slime der aerde ende gi gaeft hem Yeven in een hulpe. Here, nu ken Gi wel dat ic niet om enige welicheit of om genoecht mijns vleis dit wijf en neme, mer alleen om kinder te winnen daer uwe heilige naem gebenedijt of mach worden in ewigen tiden." Ende Sara seide: "Here, ontfarm onser. Here, ontferm onser. Ende laet ons tesamen ouden in gesontheden."

Ende omtrent middernacht doe riep Raguel sijn knechten ende si ghingen mit hem ende maecten een graf, want si duchteden dat dese jongelinc gescien soude, gelijc den anderen seven mannen gesciet was. Doe dat graf gemaect was, doe quam Raguel tot sinen wive ende seide tot haer: "Sent een van uwen diernen in die camer om te besien of die jongelinc doot is, opdat wi hem mogen begraven eert daget." Ende doe si in die camer quam, doe vant sise beide leggen slapen.

[fol. 202va]

Doe ghinc die maecht vandaen ende seide tot Raguel ende brocht hem guede maer. Ende Raguel ende Anna die gebenediden Gode ende seiden: "Wi gebenedien Di, Here God van Israhel, want ons niet gesciet en is als wi gewaent hadden, mer Gi hebt mit ons gedaen genadicheit. Ende Gi hebt van ons verdreven die viant die ons quellede. Ende Gi hebt ontfermt den tween enighen kinderen. Doetse, Here, volcomelic U gebenedien ende U een offerhande brengen tot uwen love. Ende houtse in haer gesonde, opdat al dat heydense volc mach weten dattu alleen God biste in allen lande. Doe geboet Raguel sinen knechten dat si dat graf weder vollen souden dat si voer den dage gemaect hadden.

Ende hi beval sinen wive dat si een worscap soude maken ende bereyden al dat daer noet waer voir diegene die daer comen souden. Ende Raguel dede slaen twee vette coeyen ende 4 scapen ende bereide ander spijs voir sijn vrienden ende voir sijn gebueren. Ende Raguel beswoer doe Thobias dat hi daer twee weken bi hem bliven soude. Ende van al dat Raguel hadde, so gaf hi Thobias die helft. Ende hi maecte Thobias enen brief dat hi die ander helft na sijn

[fol. 202vb]

doot ende na sijns wijfs doot op hem mede soude comen.