[9]
Doe riep Thobias den engel tot hem, die hi waende dattet een mensche was, ende seide tot hem: "Azaria, brueder, ic bidde u: hoert mijn woerden. Al gave ic u mijns selfs lichaem tot enen knecht, het en waer u voirsienicheit niet genoech. Doch, so bid ic u, dat gi beesten neemt op te riden. Ende neemt knechten mit u. Ende gaet tot Gabelus, minen neve, in Rages ende ontfanct van hem dat gelt. Ende geeft hem sinen brief ende bid hem dat hi come tot mijnre bruloft, want gi weet wel dat mijn vader die dagen telt dat ic uut ben. Ende merre ic enen dach langer, so sel sijn ziel bedroeft wesen. Ende gi siet wel hoe mi Raguel besworen heeft dat ic hem niet ontseggen en mach." Doe nam Raphael 4 van Raguels knechten ende twee camelen ende voer in Rages. Ende hi vant Gabelus. Ende hi seide hem hoe dat hi van Thobias gesent was: "Om dat gelt dat u die oude Tobias leende." Ende hi vertelde Gabelus al dat den jongen Thobias gesciet was ende dat hi hem bat dat hi tot sijnre bruloften comen soude. Ende hi gaf hem den brief ende hi ontfinc dat gelt van Gabelus. Ende Gabelus die quam mede ter bruloft. Ende doe si quamen in Raguels huys, doe
Auteursrechtelijk beschermd