Noordnederlandse Historiebijbel

Die hystorie van Thobias

[1]

Thobias was van Neptalims geslacht geboren ende hi woende onder die van Ysrahel. Ende als dat gemeen volc die gulden calveren anbeden die Jeroboam hadde doen maken, so ghinc Thobias te Jherusalem ten tempel ende anbede daer den almachtigen God. Ende hi offerde hantgift ende tiende. Ende in sijnre joecht so hielt hi altoes die geboden ende die wet Gods. Ende doe hi een man was geworden, doe nam hi een wijf van sinen geslacht, die hiete Anna. Ende hi wan een soen an haer ende noemden Thobias. Doe die coninc van Assyerien Salmanaser die van Ysrahel vinc, doe wort Thobias mede gevangen ende gevoert in Nynyve. Doe hi daer in Nynyve was, doe hielt hi sijn soen tot alre doget ende leerde hem die wet Gods. Ende als die ander van sinen geslacht aten van die heydensche spijs, die den joden verboden was te eten, daer en at hi niet of, mer hi hielt sijn siel onbesmet.

Ende omdat hi Gods gedocht in al sijnre herten, daerom gaf hem God gracie voir den coninc Salmanaser, sodat hi hem oerlof gaf te gaen waer hi woude. Thobias toech alle die steden ende al dat lant omme ende troeste die gevangen,

[fol. 198rb]

dat si ymmer die wet Gods houden souden. In die tijt quam Thobias totter stat Rages int lant van Meden. Daer vant hi enen sinen neve hiet Gabelus. Thobias leende hem 10 marc sulver. Ende des gaf hi hem weder enen brief. Thobias toech dus omme visiteren ende gaf den armen mildeliken sijn aelmissen. Daerna doe starf Salmanaser, die coninc. Ende sijn soen Sennacerib wort coninc. Die docht dat verlies dat hi voir Jherusalem hadde in des conincs Ezechias tiden, als voirseit is: dat die engel Gods bi nachte dootsloech 100.000 ende 20.000 mannen. Om dat verlies willen so sloech men voel joden doot ende die plach Thobias al te begraven. Doe dat Sennacerib vernam, doe hiet hi Thobias dootslaen ende hiet hem dat guet nemen.

Mer Thobias wort gewaerscuwet ende verbarch hem mit sinen wive ende mit sinen kinde. Ende over 45 dagen daerna doe wort Sennacerib dootgeslagen, als voir gescreven staet. Ende doe wort Thobias al sijn guet wedergegeven.