Noordnederlandse Historiebijbel

26 capittel

Ende in Zedechias negende jaer doe wederseide hi den tribuyt. Doe quam die coninc Nabugodonosor ende belach Jherusalem. Doe socht Zedechias raet an Jheremyas, den propheet. Doe seide Jheremias: "Dit seid God, die Heer: `Ic sel Zedechias sijn lant ende al sijn volc in Nabugodonosors handen geven.'" Doe quam daer tidinghe dat die coninc van Egipten quam ende woude Jherusalem ontsetten. Doe toech Nabugodonosor jegen hem te stride ende verjaechde hem uut Syrien weder in Egipten ende sloech hem voel volcs of. Ende doe Nabugodonosor van Jherusalem getogen was, doe spotteden die valsche propheten mit Jheremias ende seiden dat Nabugodonosor niet wedercomen en soude, mer dat die gevangen ende vaten wedercomen souden. Jheremyas seide daerjheghen dat die coninc ende al sijn volc gevangen most wesen. Doe woude die propheet Jheremias uut der stede gaen. Doe vingen hem die poertwach\ters

[fol. 196va]

ende seiden dat hi tot haren vianden woude gaen. Ende hi wort mit hem sessen voir die here gebrocht ende seer geslagen ende in enen kercker geleit.

Ende in datselve jaer doe sende die coninc van Babilonien sinen maerscalc Nabusardan mit sinen heren ende belach Jherusalem 18 maenden. Doe was die coninc Zedechias vervaert ende sende om den propheet Jheremias die noch in den kercker lach. Ende Zedechias die vraechde den propheet hemelic oft van Gode was dat die coninc van Babilonien voir die stede gecomen was. Doe seyde Jheremias: "Jaet." Voirt seide hi tot den coninc: "Gi moet ymmer gevangen wesen. Mer ic bid u: en doet mi niet weder in den kercker." Doe bleef die propheet onder dat volc ende riep mit luder stemmen ende seide: "Alle diegene die in der stede bliven, die sellen van honger of van den swaerde sterven. Mer die totten coninc van Babilonien gaen, die sellen gracie gescien." Doe wort Jheremyas in een modderige put geworpen, daer hi in stont ten hals toe. Doe seide een van des conincs gesin: "Here coninc, gi doet quaet dat gi den propheet Gods doden wilt." Doe wort Jheremias uut den put gedaen. Ende doe vraechde Zedechias hem noch raet. Doe seide Jheremias: "Gi en acht op minen raet niet. Ende ic seg u

[fol. 196vb]

die waerheit: gi wilt mi doden." Doe swoer die coninc dat hi hem niet misdoen en soude. Doe seide Jheremyas tot den coninc Zedechias: "Here coninc, gaet gi totten princen van Babilonien, ghi blijft behouden mit al u volc. Ende men sel die stede niet verbarnen. Ende en doe gi dat niet, gi ende al u volc sel gevangen worden. Ende die stede van Jherusalem die sel verbarnt worden." Mer die coninc noch nyement en achte op dat woert. Ende daerna doe wort groten honger in Jherusalem, dat die moeder haer kinder aten.

Ende in Zedechias 11ste jaer doe verloren si die stede van Jherusalem in hoeymaent op den negenden dach. Doe die coninc Zedechias sach dat die stede verloren was, doe vloech hi mit sinen princen ende mit sinen volc bi nacht uut der stede in der woestinen. Doe dat die van Babylonien vernamen, doe vervolchden si den coninc ende sijn volc ende vingen ende slogense alle. Ende si brochten den coninc Zedechias mit sinen volc in Anthiochien voir den coninc Nabugodonosor. Doe seide Nabugodonosor tot Zedechias: "Gi hebt dit lant van mi ontfangen. Ende ic hebbe u die croen gegeven, omdat gi mi onderdaen wesen soudt. Ende nu heb gi u jegen mi verheven. Ende oec heb gi uwen God versworen. Daerom heeft Hi u in

[fol. 197ra]

minen handen gegeven." Doe dede Nabugodonosor Zedechias kinderen onthoefden voir sijn ogen. Ende oec Sarrach, den biscop van Jherusalem, ende alle des conincs princen ende heren die dede hi doden. Ende den coninc dede hi sijn ogen uutsteken ende voerde hem gebonden in Babylonien. Ende Nabusardan, den prince, nam alle die juweelen, die cyerheit ende costelicheit die in den tempel Gods was, als gout, silver, coper ende ander metalen vaten daer men in den tempel mede diende. Oec nam hi alle die costelike siden clederen ende juweelen des tempels. Ende Jheremias die nam die arcke Gods uut den tempel mit die priesteren ende settese op enen steen. Ende hi bat an God dat hise bewaren woude. Ende God dede die arck sincken in den steen. Ende die stede is noch alle menschen verborgen. Ende Jheremias nam dat heilighe vuer van den outaer ende bedecte dat int Dal van Josaphat. Ende dat vuer wort daerna over 72 jaren ghevonden. Ende van datselve vuer ontstac die sacrifici die die joden Gode deden. Ende doe ontstac Nabusardan, die prince, den costeliken tempel Gods, die Salomon dede maken ende hi verbarnde ende verghinc. Doe nam Nabusardan alle die scat ende juweelen die in des conincs hof waren ende voerdet al in

[fol. 197rb]

Babilonien ende ontstac doe des conincs sael ende sijn hof. Ende doe ontstac hi alle die stede ende lietse barnen ende warp al die toornen ende muyeren neder.

Ende alle dat rike volc dat nam hi gevangen ende voerdet in Babylonien. Ende dat arm volc dat liet hi daer in dat lant bliven ende settede daer trybuyt op, ende dat si souden saeyen ende maeyen, planten ende poten. Ende hi beval doe dat lant enen rechter, hiet Godolyas. Ende hi liet hem ende die joden haer wet houden. Ende Nabusardan die seide tot den propheet Jheremyas: "Wil gi medevaren in Babylonyen? Men sel u daer groet eer doen ende ic sel u grote gaven ende grote rijcheit geven." Jheremyas begeerde in Judeen te bliven. Doe seide Nabusardan: "Blijft hier int lant ende woent aldaer gi wilt." Ende doe gaf hi Jheremyas grote giften. Ende hi beval die dienres des lants dat si hem sijn cost besorgen souden. Ende doe voer Nabusardan mit alle die gevanghen in Babilonyen.

Explicit liber Regum.

Et sic est finis, sit laus et gloria Trinis.

Qui legit, emendat; scriptorem non reprehendat.

[fol. 197va]

Scriptor scripsisset bene melius, si potuisset.

Qui scripsit scripta, sua dextera sit benedicta.

Talentum est quoddam pondus quod summum esset; perhibentur in Grecis et est complex; sicut minus, quod est quinquaginta librarum; medium, quod est septuaginta duorum librarum; summum centum viginti constat.

Doe Nabugodonozor in Babilonyen was mit den gevangen van Judeen, doe maecte hi een hoechtijt ende dancte sinen God ende maecte een grote worscap. Ende die coninc van Jherusalem Zedechias die lach in den kercker ende was blint. Ende Nabugodonosor mit sinen heren die saten ende aten ende droncken uut die heilige vaten des tempels. Ende somme vaten offerde hi voir sinen afgoden. Ende doe dede hi Zedechias voir hem brengen ende dede hem enen dranc drincken geven, sodat hi daer, voir der heren tafele, hem ontreynde. Ende doe wort hi weder in den kercker gedaen. Ende corts daerna doe bleef hi doot. Doe dede hem Nabugodonosor begraven geliken enen coninc toebehoerde.

Die dorde etaet began op Abraham ende duerde tot David 900 ende 42 jaer. In die etaet wort Troeyen gedestrueert ende Alba ge\maect

[fol. 197vb]

van Eneas Roma.

Die vierde etaet began op David ende duerde totdat die joden gevangen worden in Balilonyen, 400 ende 11 jaren.

Hieran soude volgen die twee boken Paralipomenon, mer, want die hystorie meest den syn in die voirseide boken geruert sijn, daerom laet ic die after te scriven. Want die namen ende die toenamen van Adam tot den geslachte van Ysrahel tenietgaet, daerin bescreven sijn ende tot onser leren niet voel en dienen, daerom laet icse after.

Ende daeran soude comen die twee boken Esdras. Ende want den sin ende die hystorie meest in der Coningen boken voirgeruert sijn ende gescreven is, so laet ict oec after te scriven.

Ende daeran soude comen dat Boec van Nemye. Ende want den sin ende die hystorie meest in der Coningen boec bescreven is, so laet ict oec after.

Ende want die guede joden mit die quade gevangen worden, so gedenct men der gueder haer werken ende haer leven in der heiliger Scrift. Mer die quade sijn vergeten ende gedaen uut den Boec des Levens.

Eerst sel men seggen van Thobias, die mede gevangen was mit die van Ysrahel van Salmanaser, den coninc van Assyrien. Dat sel men nu hier bescriven, ghelijc alst Jheronimus bescreven heeft uut den Caldeeuschen int Latijn. Ende Maerlant heeftet geset uuten Latijn in Dietscer talen.

[fol. 198ra]