Noordnederlandse Historiebijbel

25 capittel

Doe Jeconyas out was 18 jaer, doe wort hi coninc van Jherusalem ende sijn moeder hiete Naestha. Ende hi regneerde drie maenden ende 10 dagen. Ende hi sondichde voir God, als sijn vader dede, jegen die wet Gods. Ende doe docht Nabugodonosor dat hi sijn vader ende sijn vrienden gedoot

[fol. 195vb]

hadde ende of hi daerom mit den coninc van Egipten yet mocht spreken ende jegen hem striden ende quam weder voir Jherusalem. Ende bi Yeremyas des propheten raet so ghinc Jeconyas uut Jherusalem tot Nabugodonosor in sijn genade mit sijn moeder, mit sijn princen, mit sijn camerlingen ende mit al sijn huysgesin. Ende dat was in Nabugodonosors achte jaer. Ende hi nam uut Jherusalem 10.000 van den eerbaersten jongen mannen die daer in der stede waren ende voerdese in Babylonien. Ende onder die gevangen waren Ezechiel ende Mardocheus ende menich ander die Gode dienden ende die wet Gods hielden.

Ende oec mede so nam hi alle die gouden vaten des tempels. Ende oec nam hi al des conincs cyerheit uut sinen hove. Ende hi voerdet al in Babylonyen: mannen, wiven ende kinderen.

Ende hi settede Mathaniam, Jeconias oem, coninc over Jherusalem. Ende hi noemde hem Zedechias. Ende doe Zedechias out was 21 jaer, doe wort hi coninc van Jherusalem ende regneerde 11 jaer. Ende sijn moeder hiet Amythal. Ende Zedechias sondichde voir den ogen Gods ende was also quaet als Yeconyas, sijn brueder. Ende hi docht dat hi den coninc van Babilonien geen thijns geven en woude, want die valsche propheten die seiden hem dat die coninc van Egipten die coninc van

[fol. 196ra]

Babylonyen soude verslaen. Mer Jeremyas, die propheet, die seide altoes daerjegen. Ende in Zedechias vierde jaer so seinden vijf coningen boden in Jherusalem an Zedechias, als die coninc van Edom, die coninc van Moab, die coninc van Tyren, ende die coninc van Ammon ende die coninc van Saeyet, dat si den coninc van Babilonyen geen thijns geven en wouden ende dat si mit malcander hem wederstaen souden. Doe seide God tot den propheet Yeremyas: "Gaet onder u sessen totten coninc Zedechias ende totten anderen vijf coninghen ende segt hem: dit seit God, die Heer: Ic ben dieghene die dit lant gemaect heeft. Ic hebbe uwe voirvaderen daerin geset. Ende om uwer sonden willen so heb Ic dit lant in Nabugodonosors handen gegeven. Ende so wat coninc dat jegen hem vecht, dat sel Ic mitten swaerde ende mitten honger wreken."

Doe ghinc die propheet Jheremias mit hem sessen tot den ses coningen ende seide hem die woerden Gods, als God bevolen hadde. Doe was daer een vals propheet, hiet Ananyas. Die seide jeghen Jheremyas: "Hi seide dat die coninc van Babilonyen binnen twee jaer alle die gevangen ende alle die goude vaten ende alle die cyerheit weder in Jherusalem senden soude." Doe seide Jheremyas: "Amen. Ic woude dattet also gesciede,

[fol. 196rb]

mer omdat gi liecht, so sel gi binnen dit jaer sterven." Ende tenden twee maenden so sterf die valsche propheet Ananyas. Ende doe was Zedechias vervaert ende sende den tribuyt tot Nabugodonosor.