Noordnederlandse Historiebijbel

24 capittel

In Joachim Jeconyas achte jaer doe quam die coninc Nabugodonosor int lant van Judeen ende verwoestede dat lant ende wan Jherusalem ende vinc den coninc ende al dat volc. Ende doe settede hi op hem een tribuyt jaerlics te geven.

[fol. 195va]

Ende hi nam te gisel die eerbaerste kinderen ende die rijcste van Jherusalem, als Daniel, Ananyas, Azarias, Mysael. Ende doe dienden die van Jherusalem den coninc van Babylonien drie jaer. Ende doe vernam Jeconyas dat die coninc van Egipten oerlogen woude jegen den coninc van Babylonyen. Doe en wouden si hem den tribuyt niet geven. Ende doe quam die coninc van Babilonien mit enen overdracht in Jherusalem. Ende doe hi die stede machtich was, doe dede hi alle die stercste jongemannen dootslaen. Ende die coninc wordt mede verslegen ende uut der stede geworpen ende niet begraven. Ende in sijn vel vant men bescreven staen den naem van den afgod die hi diende. Ende hi en wort nye van vrienden noch van magen beweent. Joachim Jeconyas leven ende sijn quaetheit is bescreven in der Propheten boken mit den coningen van Juda. Ende Yeconyas, sijn soen, regneerde na hem.