Noordnederlandse Historiebijbel

23 capittel

Doe geboet die coninc den biscop Helchye

[fol. 194va]

ende alle die priesteren ende den levyten dat men alle die vaten die in den tempel waren daer men Baal mede plach te dienen, dat men die verbarnen soude ende die assche gieten buyten Jherusalem in dat lopende water van Cedron. Ende die teykenen die stonden in Jherusalem of tot enigen steden in Judeen, als van Baal, van die sonne of van die maen, van die 12 teykenen, of enige beelden, die dede hi al tenietmaken. Ende die tempelen die coninc Salomon dede maken binnen Jherusalem om sijn heydensche amyen willen, daer haer afgoden in waren, als Astrahoth, die afgod van Sydonien, ende Chamos, die afgod van Moab, ende Melchom, die afgod van Ammon, die tempelen ende die afgoden die dede die coninc Josyas al verbarnen. Ende men vergaderde tot dien steden dat gebeent van doden menschen. Ende in Samarien verderfde hi alle die tempelen der afgoden ende dode alle die priesteren. Ende desgelijc dede hi oec in Bethel. Ende doe quam Josyas weder in Jerusalem ende geboet al den volc dat si Paesschen souden houden, gelijc als in die wet gescreven stont. Ende men ordineerde die dienres des tempels elc in haren dienst, als Salomon dat geordiniert hadde: sangers, trompetten, organen ende ander snaerspul. Ende al dat volc offerden daer grote giften. Ende die priesteren deden Gode sacrificie, als Moy\ses

[fol. 194vb]

bescreven hadde, ende vierden die hoechtijt seven dagen lanc. Ende seer dat Samuel starf, en wort daer nye alsulken hoechtijt gehouden in den tempel Gods.

Ende in die tijt doe quam Pharo Nechao, die coninc van Egipten, om te striden jegen die coninc van Syrien. Ende doe dat Josyas vernam, doe vergaderde hi sijn volc om Pharo Nechao uut sinen lande te keren. Doe die coninc van Egipten dat vernam, doe sende hi boden an Josyas, den coninc van Judeen, ende seiden: "Here, coninc van Judeen, die coninc van Egipten die en comt niet om jegen u te striden mer jegen enen anderen coninc, want God heeft mi dat haestelic geboden. Daerom, laet of ende en doet niet jegens God, opdat gi niet verslegen en wort." Mer Yosias en woude niet ommekeren, mer hi bereide sijn volc te striden ende achte op des conincs woerden niet, mer toech tegen hem te striden. Ende doe wort die coninc Josyas gescoten ende gequetset, daer hi op sijn wagen was. Doe seide hi tot sinen knechten: "Voert mi uut den strijt, want ic ben swaerlic gewont." Doe hieven si hem op enen anderen wagen, die hem volchde, na die ghewoent der coninghen. Ende si brochten in Jherusalem. Ende hi bleef doot ende wort begraven in Jherusalem bi sinen voirvaderen. Ende in dien acker daer Josyas gescoten wort, daer stont een fonteyn ende enen groe\nen

[fol. 195ra]

boem; die verdorrede ende verdroechde rechtevoert. Ende Yeremyas ende alle die priesteren ende alle dat gemeen volc die bescreiden den coninc Yosyas langhe tijt. Alle Yosyas woerden ende wercken die sijn bescreven in der Propheten boken mit den coninghen van Jherusalem ende van Ysrahel.

Ende doe nam dat volc van Juda ende van Jherusalem Joachas, Josyas outste soen, ende maecte hem coninc na den vader. Doe Joachas coninc wort, doe was hi 23 jaer out. Ende hi regneerde 3 maenden in Jherusalem. Sijn moeder hiete Amythal. Ende die Joachas leefde sondelic voir God. Ende hi en achtede op die wet noch op die gheboden Gods niet.

Ende die coninc van Egipten, Pharo Nechao, die quam ende wan Jherusalem ende vinc Joachas ende sende hem in Egypten. Ende hi maecte Helyachim, sinen brueder, coninc van Jherusalem. Ende hi noemde hem Joachim Jeconyas. Ende Pharo Nechao die toech thuuswaert ende en nam voel cyerheits van Jherusalem. Ende hi settede tribuyt op Jherusalem ende Judeen, dat si hem jaerlics mosten geven 100 talenten gouts ende 100 talenten sulvers. Doe Joachim Jeconyas coninc wort, doe was hi 25 jaer out. Ende hi regneerde 11 jaer. Ende sijn moeder hiete Zebida. Ende hi leefde sondelic voir Gode ende en hielt die wet noch die geboden Gods niet. Ende die propheet Urias die beruspede hem daerof. Ende doe dede hi den propheet in Jherusalem doden. Doe quam

[fol. 195rb]

Yeremyas, die propheet, ende seide tot Joachim Jeconyas: "Omdat gi onmenschelic leeft ende doot die onnoesele ende die vrienden Gods, so seit God: `Ic sel minen knecht, den coninc van Babylonien, in dat lant van Judeen senden. Ende hi sel al dat lant ende Jherusalem winnen ende voeren dat volc gevangen in Babilonien. Ende si sellen daer gevanghen bliven 70 jaer lanc ende dan sellen die gevangen weder te lande comen. Ende daerna sel Ic Babylonien destrueren ende tenietmaken.'" Doe dede Jeconyas den propheet vangen ende in een kercker leggen. Doe hiet hem God dat hi die prophecie bescriven soude. Doe screef Baruch die prophesie ende gafse den coninc. Ende die coninc scoerde den brief ende warpen int vuer. Doe beval God Jheremyas die prophecie weder te bescriven, opdat si ymmer bliven soude ende seide dat Joachim Jeconyas nymmermeer kint laten soude dat Judeen na hem besitten soude. Ende sijn lichaem sel onbegraven bliven leggen buten Jherusalem.