Noordnederlandse Historiebijbel

22 capittel

Doe Yosyas 8 jaer out was, doe wort hi

[fol. 193vb]

coninc van Judeen ende regneerde 31 jaer in Jherusalem. Sijn moeder hiete Ydyda. Yosias dede dat God behagelic was. Ende hi wanderde in den wech Gods, als David wanderde in den wech Gods. Ende hi en neychde niet an die rechterside noch an die lufterside. Ende doe hi 12 jaer out was, doe dede hi al die afgoden uut Jherusalem ende uut Judeen. Ende hi brac alle die beelden ende verbarndese. Ende hi brac ende destrueerde al Baals outaren. Ende hi verjaechde die waersagers ende die gokelaers uut den lande van Judeen. Ende hi geboet al dat volc die wet Gods te houden. Daerna voer hi in Bethel ende verbarnde alle der valscher propheten gebeent, als Abdo 300 jaer te voren gesproken hadde. Ende doe hi quam daer Abdo begraven was ende hi dat scrift sach, doe en verbarnde hi des valschen propheten gebeent niet die bi Abdo begraven lach. Ende doe Yosyas die afgoden ende die beelden uut alle die steden van Judeen verdreven hadde, doe quam hi weder in Jherusalem. Ende in sijn 18de jaer doe sende hi Saphan, Maasyam, Joha, die princen van der steden, dat si weder souden doen maken dat an den tempel Gods gebroken was. Doe ghingen si tot den biscop Helchyam. Ende si namen dat gelt dat in den tempel geoffert was in dat bloc gasaphylacio ende

[fol. 194ra]

gaven dat tymmermannen, metselaren ende ander wercluden. Die coften hout, calc, yser, steen ende versierden ende maecten al dat an den tempel gebroken was.

Ende die biscop Helchyas die vant dat boec Deutronomium in der arken leggen, dat Moyses daerin geleit hadde. Ende dat gaf hi den prince Saphan, dat hijt den coninc geven soude. Doe ghinc Saphan tot den coninc ende seide: "Dat gelt dat wi in den tempel vonden, dat hebben wi den wercluden gegeven. Die sellen dat werck weder volmaken. Ende Helchyas die gaf mi desen boec, dat icken u geven soude." Ende die coninc las den boec over. Ende doe hi hoerde die grote maledictien die geschien souden over diegene die die wet ende die geboden niet en hielden, doe scoerde die coninc sijn clederen. Ende hi gheboet den priesteren, als Helchias, Ahycham, Abdon, Saphan, Asaye ende seide: "Gaet in den tempel ende bid God voir mi ende voer die van Judeen ende van Ysrahel, want wi hebben God grotelic vertoornt, want wi ende onse voirvaders en hebben die wet niet gehouden." Doe ghingen die priesteren tot Heldan, den propheet, die in Jherusalem woende ende seiden dat si tot hem ghesent waren ende wat si in den Boec des Wets gelesen hadden. Doe seide die propheet: "Sect den man die u tot my gesent

[fol. 194rb]

heeft: `Ic sel al dat quaet ende die maledictien die in dat boec staen, in dese stede senden ende op diegene die daerin wonen, want si hebben mi gelaten ende dienen afgoden. Daerom sel minen toren op dese stede comen ende en sel niet vergaen.' Mer seg den coninc van Judeen die u tot my gesent heeft: dit seit God, die Heer: `Want gi mijn wet overgelesen hebt ende hebt u hert veroetmoedicht ende hebt u cleder gescoert ende gescreit, daerom heb Ic u gehoert,' seit God. `Ende gi selt varen mit uwen vaderen ende mit rusten begraven worden. Ende gi en selt dat verdriet niet sien dat op dese stede comen sel.'" Doe ghingen die priesteren tot den coninc ende seiden hem, als die propheet geseit hadde.

Ende doe dede Josyas, die coninc van Jherusalem, vergaderen princen, priesteren, arm ende rijc. Ende die coninc las dat Boec des Wets, Deutronomium, openbaer voer al dat volc. Ende hi bat hem ende geboet hem dat si die wet Gods houden souden mit al haer herten ende mit al haer sielen, als daer gelesen was ende in dat boec gescreven stont.