Noordnederlandse Historiebijbel

21 capittel

Manasses was 12 jaer out doe hi coninc wort. Ende hi regneerde 55 jaer ende woende in Jherusalem. Ende sijn moeder hiete Aphsyba. Hi dede grote sonde voir Gode: hi anbede afgoden. Sijn vader hielt die wet Gods, mer Manasses verkeerdet al. Hi maecte in Jherusalem Baal een outaer ende anbede hem. Ende in den tempel Gods so settede hi afgoden die dat volc anbeden. Ende gokelaers ende waersagers die brocht hi in Jherusalem. Ende Manasses die vergat alle die wet Gods ende die geboden Gods die Moyses bescreven hadde. Hi dede meer quaets dan enich heyden, want hi brocht Jherusalem ende al Judeen tot sonden.

Doe seide God tot den propheet: "Omdat Manasses dit grote quaet doet boven heydenen die Ic uut desen lande verdreven hebbe, so sel Ic groet quaet op Jherusalem ende op Judeen senden. Ende op hem sellen comen die banden van Samarien ende die lasten van Achab. Ende Ic sel Jherusalem tenietmaken ende ofdoen, gelijc dat men scrift ofdoet mit enen griffi uut een tafel, want hi menich onnoesel bloet stort in Jherusalem. So wat propheten dat hem beruspeden van sijnre quaetheit, die dede hi doden. Ende Ysayas, die propheet, die was sijn

[fol. 193rb]

maech. Omdat hi hem die woerden Gods toesprac, so dede hi hem mit enen houten sage sijn lichaem doersnyden op die fonteyne van Syloe. Ende doe men hem pijnde, doe claechde hi sinen dorst ende nyement en gaf hem drinken. Doe sende hem God van den hemel water in sinen mont. Ende doe hi gelaeft was, doe sterf hi ende wort bi dat water van Sylo begraven.

Om Manasses quaetheit willen so verwrecte God den coninc van Babylonien tot striden. Ende hi sende sijn maerscalc in Judeen mit voel volcs. Ende si vingen den coninc Manasses ende voerden hem in Babilonien ende wort daer in een kerker geleit. Ende daer Manasses in den kercker lach, doe docht hi in hemselven dat hi om sijnre sonden willen in dier vangenisse gecomen was. Ende hi bat an Gode ende dede penitencie ende docht: mocht hi uut dier vangenisse comen, hi soude die wet Gods ende die geboden Gods houden. Ende God verhoerde sijn gebet ende ordineerde hem weder coninc van Jherusalem. Doe bekende Manasses dat God van Ysrahel almachtich was.

Ende doe maecte hi Jherusalem vast ende ordineerde princen in allen steden van Judeen. Ende hi verdreef uut Judeen alle die afgoden ende die beelden. Ende hi brac die outaren die hi in den tempel Gods gemaect hadde. Ende

[fol. 193va]

hi verscierde dat outaer Gods ende offerde daer offerhande op. Hi dancte ende lovede Gode. Ende hi geboet al Judeen dat si God van Ysrahel dienen souden. In sijn beghin doe leefde hi in sonden, mer in sijn outheit doe diende hi Gode.

Alle sijn woerden ende sijn wercken die sijn bescreven in der Propheten boken. Ende doe Manasses sterf, doe wort hi in sijn hof begraven bi Aza. Ende Amon, sinen soen, regneerde na hem.

Doe Amon out was 22 jaer, doe wort hi coninc van Judeen ende woende in Jherusalem. Ende sijn moeder hiete Messellemeth. Ende hi sondichde voir God, gelijc dat sijn vader eerst dede. Ende hi liet den almachtigen God after ende hi diende ende anbede afgoden. Ende hi regneerde twee jaer. Ende sijn knechten die swoeren jegen hem. Ende si leiden hem lagen ende verslogen haren coninc in sijn huys. Ende des conincs volc verslogen diegene die dat deden, ende alle die mit hem waren.

Die woerden ende wercken van Amon die sijn bescreven in der Coninghen Boecken van Judeen. Ende doe hi doot was, doe groef men hem in Azaen hof. Ende Josyas, sijn soen, die regneerde na hem.