Noordnederlandse Historiebijbel

Van Ozee, den coninc van Ysrahel. Capittelo 17

In Achas 12ste jaer doe wort Ozeas coninc van Ysrahel ende woende in Samarien ende regierde 9 jaer. Ende hi sondichde voir God meer dan die voir hem geweest hadden.

Doe quam die coninc van Assyrien Salmanaser ende wan dat lant van Ysrahel ende vinc Ozeas ende sekerde hem ende settede dat lant te tribuyt. Daerna doe sende die coninc van Egipten boden in Ysrahel, dat men den coninc van Assyrien geen tribuyt en gave. Doe quam die coninc Salmanaser in Ysrahel ende vinc den coninc Ozeas ende leide hem te Nynyve in een kercker ende destrueerde al Ysrahel. Ende hi lach 3 jaer voir Samarien. Ende in Ozeen 9de jaer doe wan hi Samarien. Ende hi vinc al die van Ysrahel ende voerdse in Assyrien ende settese daer int gebercht van Caspya. Ende daerna quam Groet Alexander ende besloetse mit der help van Gode in dat gebercht. Ende

[fol. 189vb]

daer sijn haer nacomelingen noch in. Ende Tobyas ende die ander die Gode dienden ende anbeden, die vercregen graci dat si in Nynyve ende in ander steden woenden ende hielden die wet Gods. Van dat Jeroboam coninc wort over Ysrahel na Salomon, so en hielden si nye te recht die wet Gods, want si anbeden altoes die gulden calveren. Mer God sende hem voel propheten diese beruspeden ende leerden. Mer si en achteden daer niet op ende God spaerdse lange, mer si en bekeerden hem niet. Ten lesten doe deedse God uut Ysrahel. Ende achte geslachten worden gevoert in Assyrien.

Ende die coninc van Assyrien die nam volc uut Babilonien, uut Cutha, uut Ayath, uut Emath, uut Sephervaym, ende settese int lant van Samarien ende van Ysrahel. Ende si besaten die steden. Ende doe dat volc daer woende, si en ontsagen God niet, noch si en dienden hem niet, mer si anbeden alle afgoden. Doe sende God leeuwen in dat lant van Ysrahel. Die verscoerden dat volc ende deden hem groet verdriet.

Dat wort den coninc Salmanaser geseit. Die docht dattet was, omdat si den God van dien lande niet en eerden. Doe seide Salmanaser: "Leet een van den gevangen priesteren weder in dat lant ende laet hem daer wonen. Ende laet hem dat volc die wet Gods van dien lande leren."

[fol. 190ra]

Doe toech daer een van den gevangen priesteren van Samarien ende die woende in Bethel. Ende hi leerde den volc die daer woenden, hoe dat si Gode dienen souden. Mer dat volc dat daer woende, en achte op des priesters leringe niet.

Mer elc maecte enen god die men anbat in sinen lande. Ende die edelste van haren volc die maecten si priesteren. Ende die setteden si haer goden te dienen. Ende dat gemeen volc die dienden haer goden na die gewoent der heydenen daer si onder gewoent hadden.

Mer den almachtigen God die en ontsagen si niet. Ende si en hielden sijn wet ende sijn geboden niet, mer si dienden elc haer afgoden.

Scolastica seit: Van dat die kinder van Ysrahel uut Egipten ghinghen ende datse Salmanaser, die coninc van Assirien, vinc daer was tusschen 900 ende 47 jaer. Ende van dat Roboam, Salomons soen, ende Jeroboam, sijn neve, dat volc van Ysrahel sceiden totdatse Salmanaser vinc, so was daertusschen 200 ende 40 jaer, 7 maenden ende 7 dagen.