Noordnederlandse Historiebijbel

Van Ezechias, den coninc van Judeen ende van Jherusalem. Capittelo 18

In Ozeen dorde jaer doe wort Ezechias coninc van Judeen, doe hi 25 jaer out was. Ende hi regneerde 29 jaer over Judeen ende woende in Jherusalem. Ende sijn moeder hiet Abya. Ende Ezechias dede al dat

[fol. 190rb]

God behagelic was, gelijc dat David, sijn voirvader, gedaen hadde. Ende in sijn eerste jaer ende in sijn eerste maent doe dede hi die doer van den tempel op ende ordineerde die dingen des tempels, alst behoerde. Ende hi vergaderde priesteren ende levyten ende seide tot hem: "Maect den tempel, dat huys Gods, reyn ende doet alle die onreynicheit uut der sanctuarien. Ons vaderen die hebben gesondicht ende quaet gedaen voir Gode, want si hebben Gode gelaten. Ende si hebben haer aensicht van den tempel Gods gekeert. Ende si hebben die doer gesloten. Ende si hebben die lampen ende lantaernen uutgedaen. Ende si en hebben in dat Heilich der heiligen Gode geen sacrificie gedaen. Daerom is dien toorn Gods op Judeen ende op Jherusalem gecomen ende heeftse gegeven onder haer vianden. Ende die oude sijn verslegen mit den swaerde. Ende onse wiven ende onse kinderen die sijn gevangen, mer ic begeer dat wi vrede mit Gode maken, opdat Hi sinen toorn van ons hael." Doe stonden die levyten op, als Maath, Johel, Azaria, Cys, Azarie, Joha, Eden, Samri, Jahel, Zacharias, Mathanyas, Eman, Semey, Semeyas ende Oziel. Dese priesteren vergaderden alle haer broederen die geheilicht waren na dat

[fol. 190va]

gebot des conincs. Ende si ghinghen in den tempel Gods ende maecten die reyn ende ordineerden dat alle dingen, gelijc dat Moyses eerst geordineert hadde. Ende die priesteren ende levyten wrochten daerover 16 dagen, eer si dat werc volbrochten.

Doe ghinghen si totten coninc Ezechias ende seiden hem dat die tempel Gods gesuvert ende geheilicht was. Des anderen dages vroech doe ghinc die coninc Ezechias mit al den princen van Jherusalem ten tempel Gods ende offerden daer scapen, lammeren, geyten ende ander beesten na uutwisinge der wet voir der menschen sonden. Ende daer deden die priesteren sacrifici, als die geboden der wet uutwijsden. Ende al dat ghemeen volc offerden daer mede grote gaven. Ende men hielt doe in den tempel grote hoechtijt mit sange, mit organen, mit trompetten ende mit ander snaerspul, als David dat geordiniert hadde.

Doe die hoechtijt gedaen was, doe sende die coninc Ezechias brieven in al den lande van Juda ende van Ysrahel tot den kinderen van Ysrahel die daer noch int lant gebleven waren, als van Effraym, van Manasses, van Ysachar ende van Sabulon, dat si te Jherusalem in den tempel ter hoechtijt comen souden ende houden daer Paeschen, als God geboden

[fol. 190vb]

hadde. Die somme van den kinderen van Ysrahel die spotteden daermede ende en achteden op des conincs gebot niet, mer dat meeste deel die quamen ter hoechtijt. Doe ghinc die coninc Ezechias ende brac ende verbarnde al die beelden ende afgoden die sijn voirvaderen in Jherusalem ghemaect hadden. Ende hi brac al die outaren. Ende dat metalen serpent dat Moyses in der woestinen gemaect hadde ende dat tot dien dagen toe in den tempel gestaen hadde ende van den kinderen van Ysrahel gheeert hadde geweest, dat verbarnde die coninc ende werpt in dat lopende water van Cedron. Ende hi geboet al sijn volc dat si die wet Gods souden houden ende hopen in God, den Here van Ysrahel. Ende hi hielt selve die wet Gods die Moyses geboden hadde. Ende wat hi dede, dat wrocht hi wiselic. Ende God was mit hem. Ende doe dat volc van Effraym, van Manasses, van Ysachar ende van Sabulon ter hoechtijt gecomen waren, doe hielt men die hoechtijt van Paeschen opten 14den dach in die ander maent, 7 dagen lanc. Ende dat gemeen volc offerden daer. Ende die priesteren deden sacrifici, als Moyses bescreven hadde, ende dat gemeen volc die dancten ende loefden Gode. Ende die priesteren ende die levyten die dancten ende loefden Gode mit sange, mit organen, mit trompetten ende mit snaerspele. Ende daer was doe also grote hoechtiden, dat seer Salo\mons

[fol. 191ra]

tijt nye also grote hoechtijt gehouden en was in Jherusalem.

Ende doe die hoechtijt gedaen was, doe toech een ygelic mens weder thuyswaert. Ende doe si quamen in hare steden, doe braken si alle die beelden ende afgoden ende verbarndense. Ende oec braken si die outaren. Ende die coninc Ezechias die hielt die wet ende die geboden. Ende hi minde God uut al sijnre herten. Ende hi wederseide den coninc van Assyrien den tribuyt van Jherusalem. Ende hi versloech voel Filisteen.

Ende in Ezechias 14de jaer doe quam Sennacerib, die coninc van Assyrien, in Judeen ende wan daer voel cleyne steden. Ende hi belach een stede, hiet Lachis. Doe sende Ezechias boden an den coninc van Assyrien ende seide: "Ic hebbe jegen u misdaen. Trect uut minen lande. Wat gi van mi begeert, ic selt u geven." Doe begheerde die coninc van Assyrien 300 talenten sulvers. Ende die coninc Ezechias die nam dat gelt uut den tempel ende mede des conincs scat. Ende oec brac hi dat gout van dien doren des tempels ende van die wegen ende gaf dat den coninc van Assyrien. Ende doe hi dat guet hadde, doe en achte hi niet wat hi geloeft hadde. Ende hi sende doe Rapsacis ende Tartan mit enen groten heer van volc voir Jherusalem. Ende si ontboden den coninc Ezechias. Ende Ezechias sende daer sijn overste princen, als Helyachim, Sobna ende Johe. Doe seide Rapsaces tot hem:

[fol. 191rb]

"Segt Ezechias: dit seit Sennacerib, die grote coninc van Assyrien: `Wie raet u dat gi jegen mi striden selt? Hoep gi op u volc, gi sijt seer cranc. Hoep gi op den coninc van Egipten, gi leent op een riet. Ende seg gi, wi hebben betrouwen op God, heeft Ezechias sinen God niet sacrifici gedaen? Ende al sinen volc heeft sinen God angebeden, besiet, wat help doet Hi u?' Mer coemt tot minen heer, den coninc van Assyrien. Hi sel u geven 2.000 paerden mede te riden. Weest minen heer onderdaen, opdat gi niet en vergaet." Doe seide Helyachim, Sobna ende Johe: "Wi bidden u: spreect den volc dat opter mueren staet in joetscher talen toe, dat sijt verstaen mogen." Doe riep Rapsaces den gemenen volc toe ende seide: "Hoert dat woert des groten conincs van Assirien. Dit seit die coninc: `Ezechias die heeft u bedrogen. Hi en mach u niet bescermen van minen handen. Ende uwen God en mach u niet helpen. Ende blijf gi hier, gi selt uwen drec eten ende uwen orijn drinken. Mer geeft mi die stede op, so sel gi overvloedige spise hebben. Ende ic sel u brengen in een lant dat vruchtbaer is, gelijc dit lant, van broet, van wijn, van oly ende van honich. Ende gi selt leven

[fol. 191va]

ende niet sterven. Daerom en hoert na Ezechias niet, want hi heeft u bedrogen. Ende geen goden en mogen haer volc bescermen van minen handen, hoe soude dan God Jherusalem bescermen?'" Doe sweech al dat volc. Doe quam Helyachim, Sobna ende Johe tot Ezechias mit gescoerden clederen. Ende si seiden hem alle die woerden die Rapsaces gesproken hadde.