Noordnederlandse Historiebijbel

Capittelo 12

Doe Joas out was 7 jaer, doe wort hi coninc van

[fol. 184vb]

Jherusalem ende van Juda ende regierde dat 40 jaer. Ende sijn moeder hiet Sebya ende was geboren van Barsabee. Ende hi hielt die wet Gods also lange, als die biscop Joiades leefde. Joas, die coninc van Jherusalem, die nam twee wiven ende wan daerbi knechten ende dochteren. Ende daerna doe geboet Joas den priesteren ende den levyten ende seide: "Vergadert dat gelt dat van den gemenen volc van Ysrahel in den tempel geoffert wort ende maect ende tymmert daermede dat an den tempel gebroken is." Die priesteren en achteden op des conincs woerden niet, mer si hielden dat gelt. Ende si en tymmerden niet tot in Joas 22ste jaer.

Doe seide Joas tot Joiades, den biscop, ende tot den priesteren: "Waerom en tymmer gi an den tempel niet dat daeran gebrect?" Doe wort den priesteren verboden dat si geen gelt ontfangen en souden dat den tempel toehoerde. Ende Joiades dede maken een bloc boven mit een gat. Dat set men an die rechterside binnen die doer des tempels. Ende dat bloc hiete gazaphilacium. Daer werp men dat gelt in dat men tot den tempel offerde. Ende doe die papen vernamen dat daer voel gelts in dat block was, doe ghingen die scriben tot den coninc ende tot den biscop ende seiden dat daer voel gelts int bloc was. Doe storten si dat gelt uut ende telden dat ende gavent bi getale den metselaren, den tymmerluden

[fol. 185ra]

ende den smeden. Ende die coften steen, hout ende yser ende ander dinc dat tot den tempel diende. Ende si maecten den tempel Gods weder al dat Athalia daerof gebroken hadde.

Doe den tempel volmaect was, doe maect men mit den gelde dat daer doe over was gulden ende sulveren vaten des tempels ende wyeroeckvaten in den tempel Gods mede te dienen. Mer dat gelt dat men op den outaer offerde voir der luden sonden ende voir haer misdaet, daer leefden die priesteren of.

Doe Joiades out was 100 ende 30 jaer, doe sterf hi ende hi wort begraven in Davids stat bi den coningen, omdat hi die wet Gods hielt. Ende Zacharias, sijn soen, wort biscop na hem in den tempel Gods. Doe Joiades doot was, doe verkeerden des conincs ende der princen herten. Ende si lieten den tempel Gods after ende si anbeden afgoden. Doe quam die geest Gods op Zacharias, Joiades soen. Die stont voir den coninc ende voir dat gemeen volc ende seide: "Dit seit God, die Heer: `Waerom treet gi over dat gebot Gods - dat u niet en baet - ende gi laet uwen God after?' Ende daerom sel Hi u afterlaten." Doe haelden des conincs gesin stenen ende steenden Sacarias ter doot ende al sijn kinderen. Ende sijn wijf droech kint ende dat wort na hem genoemt Sacharias. Ende die coninc Joas vergat al die doechden die hem Joiades gedaen hadde.

Doe dat

[fol. 185rb]

jaer uut was, doe quamen die van Syrien in Judeen ende verslogen voel princen ende voel volcs. Ende si namen enen groten roef ende senden die in Damasco.

Ende een luttel tijts daerna doe quam Azael, die coninc van Syrien, weder ende vacht jegen die van Geth. Ende hi verwanse. Ende doe toech hi voir Jherusalem. Ende doe nam Joas, die coninc van Juda, al die goude ende sulveren vaten des tempels die geheilicht waren ende gafse Azael, den coninc van Syrien. Ende oec so gaf hi hem al die scat des tempels, omdat hi van Jherusalem trecken soude.

Ende doe bleef Joas, die coninc, siec leggen in groter qualen. Ende dat bloet van Joiades kinderen dat riep wraec. Ende daer stonden twee van sinen knechten op, als Sabath ende Josabath, ende verslogen den coninc, daer hi siec in sijn bedde lach. Ende hi wort begraven in Davids stat. Ende Amasias, sijn soen, die regneerde na hem. Alle die woerden ende wercken van Joas die en sijn in der Coninghen boken niet bescreven mer in der Propheten boken.