Noordnederlandse Historiebijbel
(1998)–Anoniem Noordnederlandse Historiebijbel–
Auteursrechtelijk beschermd
[Folio 185va]
| |
gulden calveren. Doe wort God op Ysrahel toornich ende gafse onder Azael, den coninc van Syrien, ende oec in den handen Benedab, sijns zoens. Doe Joachas also belast was van sinen vianden, doe bat hi genade an den almachtigen God ende God verhoerde hem ende ordineerde dat die coninc van Syrien thuys toech. Ende die van Ysrahel die bleven voert mit rusten, mer si leefden gemeenlic in Jeroboams sonden. Ende Joachas die wort ofgeslegen 50 paerden, 10 wagenen, 10.000 mannen. Dat dede die coninc van Syrien. Al dat ander dat Joachas gedaen heeft, dat is bescreven in der Propheten boeken. Ende doe Joachas sterf, doe wort hi begraven in Samarien. Ende Joas, sijn soen, die regneerde na hem. Doe wort Joas coninc van Ysrahel. Ende Helyzeus die lach in siecten. Doe ghinc Joas tot hem ende screide ende seide: "Vader mijn, gi sijt den wagen van Ysrahel ende den beleder." Doe seide Helyzeus: "Haelt uwen boge ende u scut." Joas dede also. Doe seide Helyzeus tot den coninc: "Lect u hant op den boge." Ende die coninc leyde sijn hant op den boge. Doe leide Helyseus sijn hant op des conincs hant ende doe seide hi: "Doet een veynster op ten oesten waert." Joas dede also. | |
[Folio 185vb]
| |
Doe seide Helyzeus: "Lect dat scut op den boge ende sciet jegen Syrien." Joas dede also. Doe seide Helyzeus: "Gi selt Syrien verwinnen ende verslaen." Doe seide Helyzeus: "Neemt een scut in u hant ende slaet daermede op die aerde." Joas dede also ende sloech driewerven op der aerden ende stont doe stille. Doe was Elyzeus toornich ende seide: "Had gi vijfwarven of seswarven of 7-warven geslegen, gi sout die van Syrien also menichwerven verwonnen hebben. Ende nu sel gise driewerven verwinnen." Ende een tijt daerna doe starf Helyseus, die propheet, ende wort begraven bi sinen huse. Een tijt daerna doe quamen die moerdenaers van Moab in Ysrahel om te roven. Ende dat volc van Ysrahel die drogen enen doden mens uut der steden om hem te begraven. Ende doe si die rovers sagen, doe worpen sy den doden mens in des propheten Helyseus graf. Ende si liepen in die stede. Ende doe die dode mens an Heliseus heilich gebeente raecte, doe wort hi levende ende ghinc overeynde staen. Also verwrecte Helyzeus twee doden van der doot. Die coninc van Syrien die bedructe Ysrahel also lange, als Ochozias leefde. Mer God en woude Ysrahel niet laten vergaen om den vrede die hi mit Abraham, mit Ysaac, mit Jacob hadde. Ende doe sterf Aza\el, | |
[Folio 186ra]
| |
die coninc van Syrien. Ende Benedab, sijn soen, die regneerde na hem. Ende Joas, die coninc van Ysrahel, die wan Benedab al die steden van Ysrahel weder of die sijn vader gewonnen hadde. Ende Joas verwan die van Syrien driewerf, als die propheet geseit hadde. |
|