Noordnederlandse Historiebijbel

2 capittel

Daerna woude God Helyas ophalen te hemel. Doe ghinc Helyas mit Helyzeus van Galgala. Doe seide Helyas tot Helyzeum: "Sit hier, want die Heer sent mi in Bethel." Doe seide Helyzeus: "Leeft

[fol. 174vb]

God ende leeft u siel, so en sel ic niet van u sceiden." Doe quamen si tesamen in Bethel. Doe quamen daer prophetenkinderen ende seiden tot Helyseum: "Weet gi niet dat God huyden uwen heer Helyas van der aerden sel nemen?" Doe seide Helyseus: "Swijcht, ic weet dat wel." Doe seide Helyas tot Helizeum: "Sit hier, want die Here sent mi in Yerico." Doe seide Helyzeus: "Leeft God ende u ziel, so en sel ic niet van u sceiden." Doe quamen si tesamen in Yerico. Doe quamen der propheten kinderen tot Helyseum ende seiden: "Weet gi niet dat God huyden uwen heer Helyas van u sel nemen?" Doe seide Helyseus: "Swijch, ic weet dat wel." Doe seide Helyas: "Sit hier, want God sent mi ter Jordanen." Doe seide Helyseus: "Leeft God ende u siel, so en sel ic niet van u sceiden." Doe ghingen si tesamen tot opter Jordanen.

Ende hem volchden van verren na vijftich der propheten kinderen ende stonden ende sagen na hem. Doe Helyas ende Helyzeus voir der Jordanen stonden, doe nam Helyas sinen mantel ende voude die. Ende hi sloech in dat water ende dat water sceide hem. Ende si ghinghen daer beide mit drogen voeten over. Ende doe si over die Jordaen waren, doe seide Helyas tot Helyzeum: "Eyschet van my dat gi wilt. Het sel u gescien, eer dat ic van u worde genomen." Doe seide Helyzeus: "Ic bidde dat u geest der prophecien dubbelt in mi is." Doe seide Helyas: "Gi hebt een swaer

[fol. 175ra]

dinc geeyschet. Est dat gi mi siet als ic opgevoert worde, so selt u gescien dat gi begheert. Ende en sie gi mi niet, so en selt u niet gescien." Doe si dus ghingen spreken in der woestinen, siet, doe quam daer een vuerige wagen ende vurige paerden. Ende daer wort Helias opgenomen ende gevoert in den hemel. Ende Helyseus sach hem opvaren ende riep: "O, mijn vader, o, mijn vader, een wagen van Ysrahel ende haer wagenman!" Ende doe en sach hi hem niet meer.

Doe warp Helyas sinen mantel neder. Ende Helyseus nam den mantel ende ghinc ter Jordanen waert. Ende doe sloech hi mit Helyas mantel in der Jordanen ende dat water en sceide niet. Doe seide Helyseus: "Waer is nu Helyas?" Ende hi sloech noch eens mit den mantel in der Jordanen. Ende doe sceide dat water ende Helyseus ghinc daerdoer mit drogen voeten. Ende dat sagen der propheten kinderen van Yerico ende si seiden: "Helyas geest die rust op Helyzeum." Ende si quamen tot hem ende vielen op haer knyen ende anbeden hem.

Ende si seiden tot hem: "Siet, hier sijn vijftich sterker mannen; die sellen gaen soken Helyam, uwen heer. Ter avontuer die geest Gods die hevet hem verborgen in een dael int gebercht." Doe seide Helyseus: "En sent daer nyement om te soken." Doe dwongen si hem dat hi daer 50 mannen seinde int gebercht om Helyas te soken. Ende si sochten hem drie dagen, mer si en vonden hem niet. Doe bleef Helyzeus wonende in Jherico.

Doe seiden

[fol. 175rb]

die mannen van der stede tot Helyseum: "Siet, dit is een guede stede. Mer hier is een bitter water ende dat lant is onvruchtbaer." Doe seide Helyseus: "Haelt mi een nyeu vat ende doet daer sout in." Doe nam Elyzeus dat vat mit den sout ende ghinc tot dat water ende warp daer sout in ende seide: "Dit seit God, die Here: `Ic hebbe dit water gesuvert ende ten sel voertan niet bitter wesen noch onvruchtbaer.'" Ende doe ghinc Elyzeus vandaen in Betel. Ende daer hi quam gaen bi den wege, daer quamen cleyn kinderen ende bespotteden Helyzeum ende seiden: "Climt op, gi calue, clymt op, gi calue." Doe Helyseus die kinderen ansach, doe vermaledide hijse in den naem des Heren. Ende daer quamen twee beren uut den bussche ende verbeten ende doden daer 42 kinderen. Ende doe ghinc Helyzeus tot den berch Carmelo. Ende vandaen ghinc hi in Samarien.