Noordnederlandse Historiebijbel

3 capittel

Joram, Achabs soen, regierde Ysrahel ende woende in Samarien ende sondichde voir Gode ende dede die van Ysrahel sondigen, gelijc dat Jeroboam dede.

Ende Mesa, die coninc van Moab, die gaf Achab, den coninc van Ysrahel, jaerlics 100.000 scapen ende 100.000 weren. Ende doe Achab doot was, doe en woude hi dien tribuyt sinen soen niet geven.

[fol. 175va]

Doe sende Joram, die coninc van Ysrahel, tot Josaphat, den coninc van Juda, om hulpe mit hem te striden jegen den coninc van Moab. Doe seide Josaphat: "Ic sel mit u trecken, want wat mijn is, dat is u. Ende mijn volc dat is u volc. Ende mijn paerden dat sijn u paerden." Doe seide Josaphat: "Bi wat wegen sellen wi darwaert trecken?" Doe seide Joram: "Doer die woestinen."

Doe toech die coninc van Ysrahel, die coninc van Juda, die coninc van Edom seven dagen in der woestinen. Ende si en vonden daer geen water te drinken. Doe seide Joram, die coninc van Ysrahel: "Och, och, och! God hevet hier drie coningen vergadert ende Hi sel ons geven in den handen Moab."

Doe seide Josaphat: "En is hier geen propheet die Gode voir ons bit?" Doe seide daer een van Jorams knechten: "Hier is Helyseus, den propheet." Doe ghingen die drie coninghen tot Helyzeum ende vraechden hem raets. Doe seide Helyzeum tot den coninc van Ysrahel: "Wat heb ic mit u te doen? Gaet tot uwes vaders ende tot uwes moeders propheten." Doe seide die coninc van Ysrahel: "Waerom heeft God drie coninghen vergadert? Omdat Hise in den handen Moabs geven wil?" Doe seide Helyseus: "Leeft God in wes jegenwoerdicheit ic stae, soe en wil ic des conincs van Juda sijn aen\sicht

[fol. 175vb]

niet bescamen. Mer doet my comen een souter." Doe sanc Helyzeus die psalmen. Doe quam die hant Gods op hem ende hi seide: "Dit seit God, die Here: `Maect trochten ende graften.' God seit: `Gi en selt geen vint noch regen sien, mer u trochten die sellen mit water vervolt worden ende gi selt daerof drinken mit u gesin ende oec uwen beesten. Ende God sel die van Moab in uwen handen geven. Ende gi seltse verslaen ende haer steden verderven ende haer vruchtbaer bomen verbarnen. Ende haer fonteynen ende wateren die sel gi besluten. Ende haer ackeren die sel gi bedecken mit stenen."

Ende het is gesciet. Des morgens was dat lant vervolt mit water, sodat si alle droncken. Doe die coninc van Moab vernam dat die coninghen jegen hem quamen te striden, doe vergaderde hi sijn volc ende si togen striden. Ende die van Moab worden verslegen ende weken in die steden. Ende si vervolchdense ende verbarnden die steden ende bedecten die ackeren mit stenen. Ende si stopten haer wateren ende verbarnden haer bomen. Ende die coninc was belegen in enen groten stede.

Doe vergaderde die coninc van Moab vijf 100 starcker mannen ende woude uuttrecken striden jegen den coninc van Edom, mer hi wort weder in die stede gedreven. Doe nam die coninc van Moab sinen outsten soen, die na hem regieren soude, ende offerden sinen

[fol. 176ra]

god in een sacrifici ende dode hem op der mueren. Doe die drie coninghen van buten dat sagen, doe jammerdet hem. Ende si togen vandaen ende een ygelic coninc toech mit sinen volc thuyswaert.

Ende doe Josaphat te Jherusalem waert toech, doe quam Jehu in sijn ghemoet ende versprac hem, omdat hi enen man te hulpe quam die afgoden anbede.

Daerna doe vergaderden die Amonyten ende Moabiten ende wouden striden jegen Josaphat, den coninc van Juda. Ende doe dat Josaphat geboetscapt wort, doe was hi vervaert ende beanxt. Doe dede Josaphat al Judeen vergaderen om Gode te bidden dat Hi hem vertroesten woude. Doe al dat volc vergadert was voir den tempel Gods van Jherusalem, doe stont die coninc Josaphat midden onder hem ende seide: "Here, onser vaderen God, Gi sijt Here in den hemel ende in der aerden. In uwen handen is alle mogentheit ende nyement en mach U wederstaen. Nu en weten wi niet wat wi doen sellen, mer wi keren onse ogen tot U om vertroest te worden." Doe was daer een van Asaps geslacht daer die geest Gods op was. Die stont in midden der scaren ende seide: "Hoert, here coninc ende al Judeen ende al Jherusalem. Dit seit God, die Here: `En wilt niet vervaert wesen, noch ontsiet u niet, noch ontsiet niet te vechten jegen die grote scaren, want God gift die sege.'

[fol. 176rb]

Morgen sel gi jegen hem uutgaen in der woestinen. Ende hebt betrouwen: gi selt die hulpe Gods op u sien, o, Juda ende Jherusalem. En wilt niet vervaert wesen: morgen sel gi uutgaen ende God sel mit u wesen." Doe viel Josaphat ende al dat gemeen wolc op hare knyen ende dancte ende lovede Gode ende anbede Hem. Ende des morgens doe was al dat gemeen volc vroech op ende togen in der woestinen. Ende daer stont Josaphat, die coninc, midden onder hem allen ende seide: "Hoert mi, alle die van Jherusalem ende van Juda. Geloeft in uwen Here, uwen God, ende loeft sinen propheten. Het sel di voirspoedelic gaen." Ende doe ordineerde hi sijn volc. Ende die sangers van Jherusalem die ordineerde hi te gaen voir dat volc ende voir die scaren, omdat si Gode dancken ende loven souden. Ende si songen dien psalm: Confitemini Domino, quoniam bonus, quoniam in eternum misericordia eius. Beliet den Here, want Hi guet is, want sijn ontfermherticheit is in ewicheit.

Ende doe si alle den lof Gods songen, doe verkeerde God die herten der Amonyten ende der Moabiten. Ende si worden onderlinghe vechtende jegen die daer woenden int ghebercht van Seyr. Ende oec so verslogen si malcander onwetende. Ende doe die coninc

[fol. 176va]

van Juda in dat gebercht quam, doe sach hi al dat lant bedect leggen mit dode menschen.

Doe ghinc Josaphat, die coninc van Jherusalem, mit al sijn volc ende nam dat harnasch van den doden ende die costelike clederen ende die goude ende sulveren vaten, sodat si daer drie dagen over waren, eer dat si den roef vergaderden. Ende op den vierden dach doe vergaderden si in dat Dal der Benedictien ende gebenediden Gode. Ende doe togen si gemeenlic weder in Jherusalem ende dancten ende loefden Gode. Ende doe bleef Josaphat mit rusten sitten van allen oerlogen. Ende doe hi 15 jaer out was, doe wort hi coninc van Judeen ende regierde Jherusalem 20 jaer. Ende sijn moeder hiet Asuba. Ende dit waren sijn kinderen: Joram, Azariam, Jahiel, Zacharias, Mychael ende Saphatias. Ende elc van sinen kinderen die gaf hi grote rijcheit ende maectse heren van die steden van Judeen. Ende Joram, sijn outste soen, die maecte hi coninc van Jherusalem.

Ende doe starf Josaphat ende wort begraven in Jherusalem, in Davids stat. Ende al sijn woerden ende al sijn wercken die sijn bescreven in der propheten boec Jehu. Ende doe Joram gevesticht was coninc van Jherusalem, doe dede hi al sijn brueders onthoefden ende doden, omdat hi alleen coninc

[fol. 176vb]

woude wesen van Judeen.