Noordnederlandse Historiebijbel

15 capittel

In Jheroboams 18de jaer doe was Abyas coninc over Juda ende woende in Jherusalem ende regneerde daer 3 jaer. Ende daer was oerloge tusschen Abyas ende Jeroboam. Ende Abyas die vergaderde uut sinen volc die stercste ende die cloecste mannen, 40.000. Ende Jheroboam vergaderde 80.000 mannen. Doe stont Abyas op den berch Seremon ende seide: "Hoert, Jeroboam ende al Ysrahel! Weet gi niet dat God van Ysrahel David coninc maecte van Ysrahel? Ende nu verheft hem Jeroboam, die Salomons knecht was, jegens Davids kinderen ende heeft God aftergelaten ende dient Belyal ende heeft gulden calveren gemaect; die aenbeet hi voir goden. Ende wi anbeden den almachtigen God. Ende daerom sel God in onsen strijt wesen ende vertroesten ons, al heb gi meer volcs dan wi doen." Jeroboam en achte op die woerden niet, mer hi scicte sijn volc te striden jegen die van Juda, van voren ende van afteren. Ende doe Abyas sach dat hi beset was van voren ende van

[fol. 165rb]

afteren, doe riepen si alle an God. Ende die priesteren bliesen die basunen. Ende mit dat geluyt so vervaerde God Jeroboam ende al die van Ysrahel, dat si van anxt weken. Ende Abyas mit sinen volc die vervolchdense ende quetstense ende slogen wel 40.000 man. Ende die van Juda hoepten in God ende vervolchden die van Ysrahel ende vonnen hem voel steden of ende vingen die wiven ende die kinderen ende wonnen daer enen groten roef. Ende Abyas hadde 13 wiven ende hadde 22 knechts ende 16 dochteren. Ende sijn wercken sijn bescreven in Addo der propheten Boec.

Ende doe Abyas doot was, doe wort hi begraven in Davids stat. Ende Aza, sijn soen, die regierde na hem.

In die tijt doe was dat lant van Juda 10 jaer mit rusten. Ende Aza die hielt die wet Gods. Hi brac die outaren ende die afgoden verbarnde hi ende warpse in dat water van Cedron. Ende hi verdreef die waersagers, die wiven uut Judeen. Ende Aza seide tot dat volc van Juda: "God heeft ons rust verleent. Laet ons onse stede bemueren ende vastmaken." Ende doe bemuerden si die ende betymmerden die stede.

Doe quam Zara, die coninc van Ethyopien, mit 100.000 mannen ende mit 300 wagenen ende wouden striden jegen die van Juda. Ende Aza die hadde 300.000 mannen mit scilden ende mit speren, ende 70.000 mannen dat scutters wa\ren.

[fol. 165va]

Ende si quamen in dat Dal van Saphata. Doe bat Aza Gode an ende seide: "Here God, tis in uwer machten te verwinnen mit groten of mit clenen. Here God, helpt ons. Wi hebben in u betrouwen, want U en mach niement wederstaen." Doe sende God die van Ethyopien enen anxt an, sodat si weeken voir Aza. Ende Aza vervolchdese ende versloechse ende nam hem haer harnasch ende enen groten roef van camelen. Ende Asa quam weder mit sinen volc in Jherusalem.

Ende Azarias, die propheet, quam Aza jegen ende seide: "Aza van Yuda ende van Benyamin. God, die Here, die heeft mit u geweest, omdat gi Hem gedient hebt ende angebeet. Mer ist dat gi Hem laet, so sel Hi u laten, want siet, die van Ysrahel die en anbeden God niet. Ende si en hebben geen priester die hem die wet leert. Ende si sijn in anxt ende in vresen. Ende reysen si uut ende comen si in, si en hebben norgent vrede. Mer al dat heel lant dat is in anxt, want dat een volc vecht jegen dat ander volc, ende die een stede jegen die ander. Ende si sijn bedruct mit voel lasten. Mer weest gi sterc: God sel u loen wesen van uwen wercken."

Doe Aza die woerden hoerde van den propheet Azarias,

[fol. 165vb]

doe was hi gesterct ende warp al die afgoden uut Judeen ende uut alle die steden daer hi macht over hadde. Ende in Aza 15de jaer van sinen rijc doe quamen die van Symons geslacht, van Manasses geslacht ende van Effraym uut Ysrahel te Jherusalem, omdat si sagen dat God mit hem was. Ende doe offerde Aza ende al dat ander volc grote offerhande in den tempel. Ende si hielden die wet Gods. Ende si minden God uut al haer herten ende uut alle haerre sielen. Ende Aza en hadde geen strijt, voirdat hi coninc geweest hadde.

Ende int 30ste jaer doe quam Baasa, die coninc van Ysrahel, in Judeen ende begonde een stede te maken, die hiet Rama, sodat nyement uut Judeen noch in Judeen comen en mocht. Doe nam Aza dat gout ende dat sulver uut den tempel ende van des conincs scat ende sende dat Benedap, den coninc van Syrien, die woende in Damasco, ende seide tot hem: "Laet vrede tusschen u ende mi wesen, ghelijc dattet was tusschen uwen vader ende minen vader. Daerom so sende ic u dat gout ende dat sulver. Ende wrect u over Baasa ende verdrijft hem uut minen lande." Doe sende Benedap sijn heer mit enen maerscalc in Ysrahel ende wan daer voel steden ende verbarndese. Doe Baasa dat vernam, doe liet hi sijn tymmeren ende sijn mueren

[fol. 166ra]

of ende toech in Ysrahel ende bescuttede sijns selfs lant. Ende Aza, die coninc van Judeen, die nam dat hout ende die steen die Baasa daer brocht, ende tymmerde ende vestede daermede Gabaa ende Maspha.

In die tijt quam Anan, die propheet, tot Aza ende seide: "Omdat gi betrouwen had in den coninc van Syrien ende gi uwen God niet an en baet om hulpe, daerom sel die hulpe van Syrien van u genomen worden. Waren die van Ethyopien niet jegen u mit voel volcs? Ende omdat gi in God geloefde, so gafse God in uwen handen, want Hi siet over al die werelt. Ende Hi gift hem stercheit die in Hem geloven. Ende gi hebt dwaselic gedaen. Daerom sel daervan nu strijt jegen u opstaen." Doe was Aza toornich ende dede den propheet slaen mit pesericken. Ende daerom wort God seer op hem vertorent ende versloech op die tijt voel van sinen volc.

Dat beginsel van Aza ende dat eynde is bescreven in dat Boec der Coninghen mit den coningen van Juda ende van Ysrahel. Aza die quellede in sijn 39ste jaer ende hadde grote seerte in sijn voeten. Ende hi en socht geen raet an God mer an die meesters van medicinen. Ende hi sterf in dat viertichste jaer sijns rijcs. Ende hi wort begraven in Davids stat.

Ende Josaphat, sijn soen, die regierde na hem in Judeen.

Nadap, Jheroboams soen, die

[fol. 166rb]

regneerde over Ysrahel in Aza anderde jaer. Ende hi sondichde voir God ende volchde sijns vaders leven na in sonden. Ende hi dede al Ysrahel sondigen.

Ende Nadap was in een heydense stede, hiet Gebbeton. Ende Baasa, geboren van Ysachar, die versloech Nadap in die stede ende dat was in Aza dorde jaer. Ende Baasa regierde over Ysrahel ende versloech al Jeroboams huysgesin. Ende hi en liet niet enen mensche te live van sinen geslacht, als Haye, die propheet, gesproken hadde. Nadaps woerden en wercken die sijn bescreven in der propheten Boec.

In Aza dorde jaer doe regneerde Baasa over Ysrahel. Ende hi woende in Thersen 24 jaer ende hi sondichde voir God. Ende hi volchde Jheroboams leven na in sonden. Ende hi dede die van Ysrahel sondigen.