Noordnederlandse Historiebijbel

14 capittel

In die tijt hadde Jheroboam enen soen, hiet Abya; die lach siec ende quelde. Doe seide Jheroboam tot sinen wive: "Verwandelt u clederen ende gaet tot Achas, den propheet, die mi seide dat ic coninc soude wesen. Ende neemt mit u 10 broden ende een vat mit honich ende vraecht hem of dit kint genesen sel van deser siecten." Dat wijf dede also ende ghinc in Sylo tot den propheet. Ende die propheet was blint van outheit. Doe seide God, die Here: "Siet, Jheroboams wijf die sel tot u comen ende vragen u raet van haren siecken soen. Dit ende dit segt haer." Ende doe dat wijf int huys quam ende die propheet haer hoerde int huse treden, doe seide hi: "Jheroboams wijf, gi sijt hier gesent tot mi, dat gi een swaer boetscap selt dragen. Gaet ende segt Jeroboam: dit seit God van Ysrahel: `Ic hebbe u verheven uut den volc ende Ic hebbe u een heer geset over mijn volc van Ysrahel. Ende Ic hebse van Davids huys ghesceiden ende u gegeven. Ende gi en hebt mijn geboden niet bewaert ende gehouden, als David dede, mer gi hebt meer quaets gedaen dan alle diegene die voer u waren, want gi hebt gouden calveren gema\ect;

[fol. 164rb]

die anbeedt gi voer goden. Ende gi verworpt Mi van uwen aensicht. Daerom sel Ic alle quaet op u huys senden. Ende Jheroboams huys sel tenietgaen, gelijc dat den roec tenietgaet. Ende die van Jeroboams geslacht die gedoot worden in den steden, die sellen die honden eten. Ende die gedoot worden in den acker, die sellen die vogelen verscoren,' want God die heeftet gesproken. Ende nu gaet hene in u huys. Ende als gi in u huys u voet set, so sel u kint sterven. Ende dat sel alleen begraven worden van Jheroboams geslacht. Ende so wie Jheroboams huys verslaet, die sel God coninc setten over Ysrahel. Ende God sel Ysrahel doen vergaen om Jheroboams sonden willen, want hi heeft gesondicht ende heeft al Ysrahel doen sondigen."

Doe stont Jheroboams wijf op ende ginc thuuswaert. Ende doe si in haer huys quam, doe was dat kint doot. Ende het wort begraven. Ende al Ysrahel bescreide dat kint.

Alle die regnaci van Jheroboam, hoe dat hi regneerde ende vacht, siet, dat is bescreven in den Boec der woerden der dagen ende der

[fol. 164va]

coninghen van Ysrahel. Die dagen die Jheroboam regneerde, die waren 22 jaer. Ende doe hi doot was, regneerde sijn soen voir hem.

Roboam die regneerde in Jherusalem. Ende hi maecte die steden van Judeen vast ende hi bemuertse. Ende alle die priesteren ende levyten die in Ysrahel waren, die quamen in Jherusalem ende in Judeen ende anbeden den almachtigen God. Ende Jeroboam verdreefse, omdat si die gulden calveren niet en wouden anbeden. Ende doe Roboam, Salomons soen, int rijc van Juda gevesticht was, doe wanderde hi 3 jaer in den wech Gods, als David ende Salomon dede. Ende doe nam Roboam een wijf, hiet Maalath, ende was Davids soens dochter. Ende daer wan hi 3 knechten bi, als Yeus, Somosiam ende Soom. Daerna doe nam Roboam noch een wijf, hiet Maacha, ende was Absolons dochter. Ende daer hadde hi bi 4 knechten, als Abya, Ethay, Sysa, Solomith. Roboam die minde Maacha, Absolons dochter, boven al sijn wiven ende boven al sijn biwiven, ende settede Abyas, haren outsten soen, prince boven al sijn bruederen. Ende hi docht dat hi hem prince setten woude over al Juda ende Benyamin. Ende Roboam hadde 18 wiven ende 60 biwiven. Ende hi hadde 28 knechten ende 60 dochte\ren.

[fol. 164vb]

Doe hi in dat rijc van Juda gevesticht was, doe vergat hi den wech Gods ende sondichde jegen God ende maecte outaren ende afgoden op die bergen ende onder die bomen. Ende al sijn volc die deden grote sonde.

Ende in dat vijfte jaer sijns rijcs, doe quam Sesac, die coninc van Egipten, in Judeen ende wan al die cleyne stede. Ende doe belach hi Jherusalem, want hi hadde mit hem 1.000 ende 200 wagenen ende 60.000 paerden. Ende dat ander volc was ontellic. Doe ghinc Semeyas, die propheet, tot Roboam in Jherusalem ende seide tot hem ende tot den princen die voir Sesac in Jherusalem geweken waren: "Hoert, dit seit God: `Ghi volc van Juda die Mi gelaten hebt, Ic sel u laten in den handen van Sesac.'" Doe was die coninc mit sinen princen bedroeft. Ende si baden genade ende seiden: "God, die Here, die is rechtvaerdich. Och, Here God, wi hebben gesondicht. Weest ons genadich." Doe God sach dat si hem veroetmodichden ende genade baden, doe seide God tot Semeyas, den propheet: "Omdat dat volc genade bidt, so en sel Icse niet al verstroeyen, mer Ic sel hem een luttel help doen, opdat si Mi mogen dienen." Ende doe nam Sesac, die coninc van Egipten, coninc Salomons scat ende die vergulden scilden ende voerdese mit hem in Egipten. Ende Roboam dede voir die gulden coperen scilden maken, die sijn heren voerden.

Doe Roboam out was 41 jaer, doe wort hi coninc in Jherusalem ende

[fol. 165ra]

regneerde daer 17 jaer. Hi en bleef in den wech Gods niet, mer hi liet die afgoden in sinen lande. Ende tusschen Roboam ende Jheroboam was altoes strijt. Roboams wercken, sijn beghin ende sijn eynde, dat is bescreven in den Boec Semeye, des propheten, ende in Addo. Ende doe Roboam starf, doe wort hi begraven in Davids stat. Ende sijn soen Abya die regierde na hem.