Noordnederlandse Historiebijbel

13 capittel

Ende siet, God sende een propheet uut Juda in Bethel, daer Jheroboam voir dat outaer stont ende dede dat calf sacrifici mit wyeroec. Doe sende God den propheet Abdo. Ende hi riep dat woert Gods: "Outaer, outaer! Dit seit God: `Siet, van Davids geslacht sel een geboren worden ende sinen naem sel Yosyas wesen; die sel op dat outaer die hogepriester die daer nu wieroec geven, haer gebeente verbarnen.' Ende tot enen teyken dat God dit seit, so sel dat outaer breken ende die assche ver\stroeyen."

[fol. 163rb]

Doe Jeroboam die woerden Gods hoerde die jegen hem waren van den propheet, doe tastede hi na hem ende woude hem vangen. Doe wort sijn hant verdorret ende hi hadde grote werten. Ende dat outaer brac ende die assche verstroeyde, als die propheet geseit heeft. Doe seide Jheroboam tot den propheet: "Man Gods, bid uwen God voir my dat Hi mi verlene gesontheit in mine hant." Die propheet badt an God ende God verleende coninc Jheroboam gesontheit in sinen handen.

Doe seide die coninc Jheroboam tot den propheet: "Coemt, eet u middachmael mit my ende ic wil u giften geven." Doe seide die propheet: "Al gaef gi mi half u guet, ic en aet niet mit u een brocke broets, noch en dronke oec mit u een toech waters in uwe stede, want God heeftet mi verboden dat ic niet eten noch drinken en soude ende dat ic enen anderen wech reysen soude, dan ic harwaert quam." Doe reet Abdo, die propheet, van Betel op sinen ezel.

Doe woende daer een out, valsch propheet in Bethel. Ende sijn kinderen quamen ende seiden hem wat daer in dien dage gesciet was van den coninc ende van dat outaer. Doe

[fol. 163va]

seide die valsche propheet: "Wat wech is hi gereden?" Ende sijn kinderen die wijsdent hem. Doe bereet men hem enen ezel. Ende hi reet den propheet Gods na. Ende doe hi bi hem quam, doe seide hi: "Sie gi die man Gods die van Juda quam?" Abdo seide: "Ic bent." Doe seide die valsche propheet: "Coemt ende eet mit my." Doe seide Abdo: "Ic en mach niet mit u eten noch drinken, want God heeftet mi verboden." Doe seide die valsche prophete: "Ic ben propheet, als gi sijt. Ende die engel Gods heeftet mi geseit: `Leet den propheet in u huys, dat hi broet mit u eet ende water mit u drinke.'" Doe reet Abdo mitten valschen propheet ende at mit hem. Ende doe si over tafel saten, doe quam den geest Gods in den valschen propheet ende seide tot Abdo: "Dit seit God, die Here: `Omdat gi sijn gebot overhorich geweest hebt ende hebt jegen sijn gebot gegeten ende gedronken, soe en sel gi mit u vaderen in u lant niet begraven worden.'"

Ende doe Abdo gegeten ende gedronken hadde, doe reet hi te Jherusalem waert. Ende daer quam een leeu in den wech ende beet Abdo doot. Ende die leeu bleef bi dat lichaem ende bi den ezel

[fol. 163vb]

staen. Ende hi en misdede hem niet meer. Ende siet, daer quamen mannen bi den wech gaen ende sagen een doot lichaem daer leggen ende een leeu daerbi staen. Ende si quamen ter stede daer die valsche prophete woende ende seiden dat daer in den wech een doot man lach. Doe dat die valsche propheet hoerde, doe reet hi daer mit enen ezel ende vant Abdo daer doot leggen ende den leeu ende den ezel daerbi staen. Doe leide hi dat dode lichaem op den ezel ende voerdet in die stede ende bescreydet ende begroeft in sijn graf. Ende doe seide hi tot sinen kinderen: "Als ic doot ben, so graeft mi in dat graf des propheten bi des propheten benen, want als God doer hem gesproken heeft, dat sel al gescien.

Mer wat Jeroboam gesien of gehoert hadde, hi en bekeerde hem niet. Hi bleef in sijnre quaetheit. Om sijnre sonden willen so dede God sijn huys ende sijn geslacht vergaen ende die priesteren die in Ysrahel binnen den steden ende daerbuten waren ende oec voel van den gemenen volc. Doe si die quaetheit van Jheroboam sagen, dat hi die gulden calveren eerde ende anbede voir God, doe sceiden si van hem ende togen te Jherusalem ende anbeden daer den almachtigen God. Ende si bleven daer

[fol. 164ra]

onder Roboam wonende.