Noordnederlandse Historiebijbel

12 capittel

Doe quam Roboam in Sy\chem.

[fol. 162rb]

Ende daer was al Ysrahel voir hem vergadert om hem tot enen coninc te kyesen. Ende Jeroboam, Nabaths soen, die voer Salomon gheweken was in Egipten, doe hi verhoerde dat Salomon doot was, doe quam hi weder in Ysrahel ende was mit die van Ysrahel voir Roboam. Doe seiden die van Ysrahel tot Roboam: "Ju vader hadde ons een swaer last opgeleit. Wy bidden u: verlicht ons wat van dien swaren last, so sellen wi u trouwelic dienen."

Doe seide Roboam: "Ic sel mi beraden gaen. Ende comet op den dorden dach weder." Doe beriet hem Roboam mit die oude princen die mit sinen vader gedient hadden ende seide: "Wat raet geef gi mi? Wat sel ic dit volc andwoerden?" Doe seiden die oude princen: "Gi selt dat volc guedertieren wesen ende spreken hem suetelic toe ende seggen haer dat gi haer bede doen selt; so sellen si u trouwelic dienen." Doe seide Roboam tot den jongelingen die mit hem opgevoet waren ende bi hem stonden: "Wat raet geeft gi mi dat ic desen volc andwoerden mach, die lichtenis begeren van dat mijn vader op hem geset heeft?" Doe seiden die jongelingen tot Roboam: "Aldus sel gi den volc

[fol. 162va]

toespreken, die lichtenis van u begheren: minen mintsten vingher die is meerre dan mijn vader al sijn heel lijf was. Ende gi segt: minen vader heeft u enen swaren last opgeleit. Ende daer sel ic noch enen last op laden. Mijn vader heeft u mit roeden geslegen. Ende ic sel u mit geselen slaen." Ende op den dorden dach doe quam Jheroboam mit die van Ysrahel tot Roboam ende seide: "Wi sijn hier gecomen, als gi tot ons geseit hebt." Doe sprac hem Roboam herdelic toe ende liet den raet der ouder princen after. Ende hi dede den raet der jonger princen ende hi seide tot den volc: "Mijn vader die hadde u swaerlic belast ende ic sel u noch swaerliker belasten. Mijn vader sloech u mit roeden ende ic sel u mit geselen doen slaen."

Doe dat gemeen volc dat hoerde, doe seiden si: "Wat leit ons an Ysays kinderen? Wat deel hebben wi mit hem? Laet ons gaen tot der tabarnakel in Ysrahel ende laet Davids gheslaecht gaen tot haer tabarnakel." Ende die van Ysrahel die ghinghen van Roboam. Ende doe sende Roboam Aduram, sinen prinse, om tribuyt tot die van Ysrahel. Ende die van Ysrahel steenden Aduram ter doot. Doe dat Roboam vernam, doe liep hi op sinen wagen ende reet in Jherusalem. Ende doe sciet Ysrahel van Davids geslacht.

[fol. 162vb]

Ende nye en vergaderden si weder. Ende doe vergaderden die 10 geslachten van Ysrahel ende coren Jeroboam tot enen coninc. Ende Roboam bleef coninc van twee geslachten, als van Juda ende van Benyamins geslacht. Ende hi behielt Jherusalem. Doe vergaderde Roboam alle die weerachtige mannen van Juda ende van Benyamin. Ende daer wasser 100 ende 80.000; daer woude hi mede striden jegen die van Ysrahel.

Doe sende God den propheet Semeyam tot Roboam ende tot sinen volc, die hem seide: "Hoert wat God seit: `Trect niet te stride jegen u bruederen van Ysrahel, mer trect thuys, want dat Jeroboam coninc is, dat is van Mi gesciet.'" Doe togen die van Juda ende van Benyamin thuys, als hem God beval.

Doe maecte Jheroboam Sychem vast ende woende daerin. Doe dochte Jeroboam in sijnre herten ende seide in hemselven: "Est dat dit volc te Jherusalem trect ter hoechtijt ende offert daer ende doet daer sacrifici in den tempel, so sel Roboam hoer hert verkeren ende kyesen hem tot enen coninc. Ende dan sellen si mi dootslaen." Ende uut dat gedocht so maecte hi twee gulden calveren ende seide tot die van Ysrahel: "Wilt niet ter hoechtijt gaen in Jherusalem, mer blijft hier ende doet u goden sacrifici, want siet, dit sijn u goden die u uut Egypten leden." Ende hi settede dat een calf in Dan ende dat

[fol. 163ra]

ander in Bethel. Ende hi dede grote sonde voir God, want dat volc ghingen in Dan ende deden den calf sacrifici. Ende Jeroboam settede daer vreemde mannen tot priesteren die van Levijs geslacht niet en waren. Ende hi settede daer die hoechtijt opten 15den dach in die achte maent. Ende si hielden daer die hoechtijt seven dagen lanc, gelijc dat mense hielt in Jherusalem. Ende desgelijcs dede Jeroboam een outaer maken in Bethel ende daer settede hi op dat ander gulden calf. Ende hi settede daer vreemde priesteren die van Levy niet en waren. Ende Jeroboam settede daer die hoechtijt na sijnre herten opten 15-den dach van die achte maent. Ende die van Ysrahel offerden voer dat calf ende deden hem sacrifici, gelijc dat men Gode dede.