Noordnederlandse Historiebijbel

11 capittel

Doe coninc Salomon in deser groter moghentheit ende rijcheit was, doe vercoes hi voel vreemde wiven, als des conincs dochter van Egipten, des conincs dochter van Moab, van Ammon ende van Ydumeen, van Sydonen, van Etheen ende van al den heydenen die hem omtrent saten, sodat Salomon hadde 700 coninghinnen ende 400 concubinnen, biwiven. Ende doe hi out was, doe verkeerden hem die wiven sijn herte. Ende si deden hem afgoden anbeden. Ende Salomon maecte tempelen buten Jherusalem, daer die heydensche coninghinnen hoer afgoden in setteden, als Asthersen, die afgoddin van Sydon, ende Chamos, die

[fol. 161va]

afgod van Moab, ende Moloch, die afgod van Ammon. Ende alsoe maecte hi voel van sinen wiven tempelen, daer si haer afgoden in setteden. Ende Salomon die offerde voer die afgoden ende dede daer sacrificie voer mit wyeroec, gelijc dat men voir den almachtigen God dede.

Doe was God van Ysrahel toornich op Salomon, omdat hi van Hem keerde ende aenbede afgoden ende en hielt die geboden Gods niet. Doe seide God tot Salomon: "Omdat gi mijn geboden niet en hout ende anbeet afgoden, so sel Ic u rijc van u halen. Ende Ic selt Jeroboam, uwen knecht, geven. Mer binnen uwen leven en sel Ic dat niet doen om David, uwes vaders, willen. Mer van uwes soens hant sel Ic dat rike breken. Mer van een geslacht sel hi heer bliven ende van Jherusalem om Davids, mijns knechts, willen."

Doe verwrecte God Adad van Ydumeen. Doe David in Ydumeen was, doe versloech Joab alle die mannen die in Ydumeen waren. Doe weeck Adad in Egipten mit sijns vaders huysgesin, want hi een kint was. Ende die coninc van Egipten die gaf Adad sijns wijfs suster tot enen wive. Ende si hiete Tafnes. Ende Adad wan an haer enen soen, hiet Genebath. Ende

[fol. 161vb]

doe Adad verhoerde dat David ende Joab doot waren, doe begheerde hi oerlof weder tot sinen lande te trecken. Ende die coninc van Egipten die gaf hem oerlof. Doe oerloechde Adad mit die van Ydumea op Ysrahel. Doe David den coninc van Soba versloech, doe weeck enen van sinen knechten in der wildernisse ende worde een prince der roveren ende hiete Rason; die toech in Damasco ende wort daer een coninc gemaect. Ende die oerlochde jegen Salomon alle die tijt dat hi in sonden levede.

Salomon hadde Jeroboam, sinen neve, geset te bewaren Davids casteel in Jherusalem. Ende hi ontfinc dien tribuyt van Judeen, omdat hi een wijs, cloec man was.

Op een tijt ghinc Jheroboam uut Jherusalem ende hem moete Ahyas, den propheet, ende hadde om hem enen nuwen mantel. Doe nam den propheet die mantel ende scoerden in 12 stucken. Ende hi seide tot Jheroboam: "Nemet die 10 stucken van den mantel, want dit seit God van Ysrahel: `Siet, Ic sel dat rijc van Ysrahel van Salomon halen ende Ic sel u die 10 geslachten geven. Ende an Salomons kinderen sel een geslachte bliven ende die stede van Jherusalem om Davids, mijns knechts, willen. Ende Jherusalem heb Ic vercoren ende daerin sel minen naem bliven. Ende gi selt coninc wesen

[fol. 162ra]

van Ysrahel. Est dat gi in minen wech wandert ende mijn wet ende mijn geboden hout, als David, mijn knecht, dede, so sel Ic mit u wesen ende u huys verheffen, als Ic Davids huys dede.'" Doe Salomon vernam wat den propheet geseit hadde tot Jheroboam, doe woude Salomon Jheroboam doden. Mer Jheroboam toech in Egipten tot den coninc Sesac ende was daer also lange, totdat Salomon doot was.

Die heilige Scrift seit dat Salomon 40 jaer regneerde ende coninc was in Ysrahel. Mer die tijt dat hi in sonden levede, daer en seit die Scrift niet of. Mer ander boken seggen dat Salomon out was 94 jaer. Ende doe hi 40 jaer coninc geweest hadde, doe wort hi van den wiven bedrogen ende aenbede ende diende om haren willen afgoden. Men seit dat Salomon in sijn laetste eynde berou van sinen sonden hadde ende dat hi grote penitencie dede. Mer men seit oec dat hi die heydensche wiven in Ysrahel liet bliven ende dat hi haer tempelen ende haer afgoden niet en destrueerde, mer lietse in sinen lande bliven. Als Josephus seit, so was Salomon 94 jaer out, doe hi starf ende wort begraven in Davids sijns vaders stat, in Jherusalem. Ende doe regneerde Roboam, sijn soen, na hem.