Noordnederlandse Historiebijbel

10 capittel

Salomons grote wijsheit ende

[fol. 160rb]

sijn wonderlike rijcheit die wort vermaert in verren landen, also dat Sybilla, die coninghinne van Saba, tot Jherusalem quam om sijn wijsheit te ondervinden ende sijn rijcheit te sien. Ende si brocht mit haer groet gesin ende grote rijcheit van goude, van gesteente ende van costeliken cruden op camelen. Doe quam die coninghinne tot Salomon. Ende si gaf hem grote giften van goude, van gesteent ende van costeliken cruden. Ende sonderlinghe so gaf si hem een balsomwortel; die plantede Salomon in Engadi. Ende daerof wies daer den eersten balsom. Doe sprac die coninginne Sibilla mit Salomon ende si vraechde hem al dat in haerre herten was. Ende Salomon die berechtede haer mit natuerlike reden ende consten ende mit besceiden.

Ende bysonder so hadde Sibilla twee lelien: die een was gewassen ende die ander was gemaect van meesters handen. Doe settede si die lelien voir Salomon ende seide: "Here coninc, welc van dien lelyen is gewassen van natueren, of welc is van meesters handen gemaect?" Ende Salomon en conde dat mitten gesichte niet ondersceiden ende dede doe comen een hantvol byen ende liet die vliegen. Doe vlogen die bien in die lelye die natuerlic

[fol. 160va]

gewassen was. Ende also vant Salomon dat bi natueren.

Doe was daer een meystgin ende een knechtgin bi Sybilla van eenre groetheit ende gelijc van vormen. Doe seide Sybilla tot Salomon: "Welc is dat meystgin of dat knechtgin van dien tween kinderen?" Mitten gesichte en conde Salomon dat niet ondersceiden, mer hi seide: "Laet mi comen een deel appelen." Ende Salomon warp die appelen voir die kinderen. Doe nam dat knechtgin in elke hant enen appel ende dat meystgin vergaderde die appelen in sijn slippe. Doe seide Salomon: "Dat ist knechtgin ende dat ist meystgin." Ende diergelijc so ondersocht ende vraechde Sibilla den coninc Salomon menigherhande dingen. Ende Salomon bewijsdet haer alle mit reden, of mit natueren, of mit fygueren, sodat haer verwonderde van sijnre wijsheit.

Ende doe die coninghinne Sybilla die grote wonderlicheit ende cyerheit des tempels gesien hadde ende die grote offerhande ende sacrificie die men daer dede, dat verwonderde haer seer. Ende doe si gesien hadde dat getymmert van sijnre salen ende van sijnre woninghe ende dat huys in der busscaelgen ende wat cost van spisen ende van dranc dat men dede in sinen hove, ende

[fol. 160vb]

si sach die menichvoudige dienaren die daer dienden in Salomons hof ende hoe dat si versiert waren van clederen, want men dorste nyement vragen wat dienst dat yement hadde in Salomons hof, want het was op haer clederen gewrocht wat dienste dat elc hadde, doe dese coninghinne dit al gesien hadde ende sijn wijsheit gehoert, doe seide si tot den coninc: "Here coninc, ic hebbe in minen lande horen seggen van uwer wijsheit ende van uwer moghentheit, mer ic en woude dat niet geloven. Mer nu ic dat selve gesien ende gehoert hebbe, nu vinde ic dat die wijsheit ende die moghentheit te helfte meerre is dan mi gheseit was. Salich sijn die heren ende die knechten die dagelics voir u dienen ende uwe wijsheit horen. Ghebenedijt si uwe Heer, uwe God, die u dese moghentheit gegeven heeft ende hevet u here geset over die van Ysrahel, omdat gi oerdel ende rechtvaerdicheit doen sout." Doe gaf die coninghinne den coninc 100 ende 20 talenten sulvers ende gouts ende voel costeliker cruden ende duerbaer gesteenten. Ende Salomons knechten die voeren mit Hyrams knechten in Ofyr ende brochten vandaen gout ende hout van tyna dat wonderlic wel roec. Daer maecte

[fol. 161ra]

Salomon sittenen of in den tempel daer die sangers ende die ander dienres op saten. Ende oec brochten si vandaen voel costelike gesteent. Ende coninc Salomon gaf der coninghinnen van dat welrukende hout ende ander cyerheit ende juweelen die si van hem begheerde ende in haren lande niet en waren. Ende doe toech si mit haren ghesin thuuswaert.

Ende alle jaer so sende si Salomon 500 ende 66 talenten gouts. Ende die coninc van Arabyen ende alle die coningen die daeromtrent saten, die senden coninc Salomon gout ende costelike gesteent ende grote cyerheit.

Doe dede coninc Salomon maken 300 gouden scilden al van finen goude ende 200 gulden glavien. Ende die waren al in dat huys der busscaelgen.

Doe verscyerde Salomon sijn sael ende sijn cameren mit wonderliker scyerheit van sittenen van elpenbenen, die trappen van goude. Ende dat sitten van sinen throen dat was rontghecirkelt. Ende op elke side van dat sitten daer stont een gulden leeu. Ende voer dat sitten waren ses trappen van finen goude. Ende op elke trappe daer stont een gulden leeu van finen goude. Ende alsulc versiert werc en was in al die werelt niet.

Ende alle die vaten daer Salomon mit sinen volc uut dranc in der salen, waren al van finen goude. Ende die dekenen ende ander cleder ende gordinen die waren al besticket mit goude, want in Salomons tiden doe en was dat sulver niet geacht in Jherusalem, want in 3 jaren eens so voeren die scepen

[fol. 161rb]

in die eylanden van Thersen van Salomons wegen. Ende si brochten vandaen gout, sulver, tanden van olyfanten, apynnen, paeuwen ende ander wonderlike dieren die te Jherusalem niet en waren.

Ende Salomons wijsheit, rijcheit ende moghentheit die ghinc boven alle die coningen der aerden. Ende alle die coninghen brochten Salomon grote rijcheit, syerheit ende wagenen ende paerden, also dat Salomon vergadert hadde 1.000 ende 400 wagenen ende 12.000 heynxten. Ende die sende Salomon al buten Jherusalem in steden ende in dorpen te voeden.