Noordnederlandse Historiebijbel

16 capittel

God sende Jehu, den propheet, tot Baasa; die sprac tot hem ende seide: "Dit seit God: `Ic hebbe u verheven uut der asschen ende geset een heer te wesen over mijn volc van Ysrahel. Ende gi volcht Yeroboams leven ende gi doet mijn volc sondigen. Daerom sel Ic u huys doen vergaen, ghelijc dat Jeroboams huys vergaen is, die van u gedoot is in die stat van Gebbeton. Ende die honden aten sijn vleis. Ende die buten der steden ge\doot

[fol. 166va]

worden, die aten die vogelen.'"

Ende omdat Jehu Baasa beruspede van sinen quaetheit, so dede hi hem doden. Dat vrac God over hem, want sijns selfs ridder versloech hem in Thersen. Ende daer wort hi in begraven.

Ende in Aza 26ste jaer doe regierde Hela in Ysrahel na Baasa, sijn vader, in Thersen 2 jaer. Ende daerna hadde hi kijf jegen Samri, sijn maerscalc. Ende Hela sat ende at over sijn tafel in Thersen. Ende Samri quam ende sloech hem doot ende regneerde voir hem. Ende doe sloech Samri al Baasans kinderen ende huusgesin doot ende liet daer niet een of levende, als God door Jehu, den propheet, gesproken hadde.

Ende in Aza 27ste jaer doe regneerde Samri over Ysrahel in Thersen. Ende sijn tijt en duerde mer seven dagen, want Hela maerscalc lach voir een heydensche stede, hiet Gebbeton. Ende doe die maerscalc Amri verhoerde dat Samri Hela, den coninc, verslegen hadde, doe coren die van Ysrahel hem tot enen here. Ende doe toech hi van Gebbeton ende belach Thersen. Doe Samri sach dat hi in Thersen belegen was, doe ghinc hi in des conincs sael ende ontstac die ende lietse barnen, ende barnde hem\selven

[fol. 166vb]

daerin. Ende also sterf hi in sinen sonden.

Doe wort Ysrahel gesceiden in tween delen. Ende dat een volc dat bleef bi Ambri ende dat ander deel van den volc bi enen heer, hiet Thebin. Mer Thebin en leefde niet langhe ende starf. Ende doe bleef Ambri heer over al Ysrahel.

In Aza 30ste jaer doe regierde Ambri Ysrahel 12 jaer lanc in Thersen. Ende doe coft hi den berch van Samarien jegen enen man, hiet Somer, om 2 talenten sulvers. Ende hi tymmerde daer een stede op ende noemdese Samarien.

Doe sondichde Ambri jegen God ende die van Ysrahel sondichden jegen die wet Gods. Ende daerna doe sterf Ambri ende wort begraven in Samarien. Ende Achab, sijn soen, die regierde na hem over Ysrahel ende woende in Samarien. Ende dat gesciede in Aza, coninc van Juda, 38ste jaer. Ende Achab regierde over Ysrahel 22 jaer. Ende doe sondichde hi voer dat aenschijn Gods. Ende hi volchde Jheroboams leven na ende wort arger dan Jheroboam in sonden, want hi nam een heydens wijf, ende hiet Yesabel, des conincs dochter van Sidoni. Ende hi anbede haren afgod Baal ende maecte hem een tempel ende een outaer in Samarien. Ende Achab wort arger in sonden dan enich coninc van Ysrahel die voer hem geweest hadde.

Ende in die tijt doe tymmerde Ahyel Yerico weder op, als God over Josue

[fol. 167ra]

gesproken hadde.