Noordnederlandse Historiebijbel

2 capittel

Doe David seer out was ende hi Salomon coninc geset hadde over al Ysrahel, doe ontboet hi al sijn princen voir hem ende oec die priesteren ende die levyten die boven 20 jaren waren, ende die wasser daer 38.000. Ende aldaer vercoes David uut 6.000, die souden princen wesen ende rechters ende regierres in den tempel over die ander. Doe ordineerde David 4.000, die souden sluters ende ontsluters wesen in den tempel ende van al dat in den tempel was. Ende doe ordineerde David 4.000 sangers, die souden op die organen ende op die ander instrumenten spelen ende singen den lof Gods. Ende die ander 24.000 levyten

[fol. 150vb]

die sellen ellic een dusent haer termijn in den tempel dienen.

Doe seide David tot Salomon: "Weest sterc ende en ontsiet u niet. Ende bewaert die geboden Gods ende wandert in sinen wech ende weest rechtvaerdich. Ende hout die wet, gelijc datse Moyses bescreven heeft. Ende doe gi also ende u kinderen na u, so sellense altoes in die coninclike mogentheit bliven." Voert seide David tot Salomon: "Ghedenct dat Joab twee eerbaer princen vermoert heeft, als Abner ende Amasa. Recht dat na uwer wijsheit, ende Semey, die my vloecte ende vermaledide, doe ic weec voer Absolon. Mer hi quam weder ende bat genade. Ende ic swoer dat ic hem niet doden en soude. Hout hem bi u. Doet hi jegen u gebot, recht dat na uwer wijsheit. Ende Bersellays kinderen, hout die by u ende laetse eten van uwer tafelen, want haer vader voede mi in der woestinen, doe ic weec voer Absolon."

Ende doe David 40 jaer coninc geweest hadde, 7 jaer in Ebron ende 33 jaer in Jherusalem, doe starf hi in doechden ende wort begraven in sijn stat.

Ende Salomon, sijn soen, die groef om sijn graf tot achte steden groten scat. Die 2 scatten ondede den biscop Yrcaen ende verloste Jherusalem daermede van haren vianden. Ende Herodes Asscolonyta die ondeder een ende tymmerde daermede in Jherusalem een gasthuys. Ende die ander vijf scatten

[fol. 151ra]

die leggen daer noch, mer nyement en weetse te vinden.

Salomon die sat in sijn coninclike macht ende was daer vast in gelijc sijn vader. Doe ghinc Adonyas tot Barsabee, Salomons moeder, in haer camer ende seide: "Mit oerlof come ic hier tot u." Doe seide Barsabee: "Weest hier in vreden. Wat is u begeert?"

Doe seide Adonyas: "Gi weet dat dat conincrijc van Ysrahel my toebehoerde, want ic die outste erfsoen was. Mer die coninc die heeft mijn brueder daerin geset. Daerom begheer ic nu een bede. Ic bidde u: versmeet die niet." Doe seide Barsabee: "Segt u begeren." Doe seide Adonyas: "Ic bidde u: gaet tot coninc Salomon, want hi en sel u niet weigeren, ende bidt hem dat hi my geve Abysag, mijns vaders wijf, want si noch maecht is, tot enen wive." Doe seide Barsabee: "Ic sel die boetscap an den coninc doen." Doe quam Barsabee tot Salomon. Doe stont Salomon op jegen sijn moeder ende deedse sitten an sijn rechterside. Doe seide Barsabee: "Here, ic begheer an u een cleyn bede. Ic bidde: en weigert mi die doch niet." Doe seide Salomon: "Moeder, segt u begeren. Ten betaemt mi niet dat ic u weygeren soude." Doe seide Barsabee: "Mer so bid ic u: geeft Adonyas, u brueder, Abysag, die uwes vaders wijf was, tot enen wive."

Doe seide Salomon tot sijn moeder: "Waerom bid gi dat ic Abysag soude geven Adonyas? Bid hem om dat conincrijc, want hi is mijn out\ste

[fol. 151rb]

brueder. Ende hi heeft mit hem den priester Abyather ende Joab ende voel van mijns vaders gesin." Doe swoer Salomon ende seide dat Adonyas jegen sijn leven gebeden hadde. Ende oec seide hi: "Leeft God die mi gescepen heeft ende die mi geset hevet op mijns vaders stoel, Adonyas die sel huden gedoot worden." Ende doe sende die coninc Salomon Bananyas tot Adonyas ende die sloech hem doot.

Doe ontboet Salomon den priester Abyather voer hem ende daer seide hi toe: "Gaet uut Jherusalem in Anatoth tot uwen acker. Omdat gi die arck Gods voir mijn vader brocht in Jherusalem ende gi voel arbeits voer mijn vader gedaen hebt, soe en sel ic u niet doden." Ende hi settede hem uut den dienst der priesteren. Doe quam daer een bode tot Salomon dat Joab in die tabarnakel geweken was ende hielt den hoec van den outaer. Doe sende Salomon daer Bananyas tot Joab ende seide tot hem: "Gaet uut die tabarnakel." Doe seide Joab: "Ic en wil uut der tabarnakel niet, mer ic wil daerin sterven." Doe ghinc Bananyas tot Salomon ende seide hem wat Joab geseit hadde. Doe seide Salomon: "Doet als hi geseit heeft." Doe ghinc Bananyas ende versloech Joab in die tabernakel. Ende hi wort begraven in sijn

[fol. 151va]

hof in der woestinen. Doe settede Salomon Bananyas maerscalc in Joabs stede ende hi settede Sadoch priester in Abyathers stede.

Doe ontboet Salomon Semey ende seide tot hem: "Maect een huys in Jherusalem ende woent daerin. Ende en gaet uut Jherusalem niet; tot wat tijt dat gi uut Jherusalem gaet, so sel men u doden." Doe dancte Semey den coninc ende seide, hi soude doen als hi hem bevolen hadde. Ende Semey bleef in Jherusalem wonende lange tijt. Ende na drie jaren so togen Semeys knechten tot Achis, den coninc van Geth. Ende dat wort Semey geseit, dat sijn knechten in Geth waren. Doe bereide Semey enen ezel ende reet in Geth ende haelde sijn knechten. Ende dat wort Salomon geseit, dat Semey in Geth geweest hadde uut Jherusalem. Doe ontboet Salomon Semey ende seide: "Had ic u niet geboden dat gi uut Jherusalem niet gaen en sout op u lijf? Ende gi seide, het genoechde u wel; gi soutet doen. Waerom heb gi nu mijn gebot gebroken?" Doe geboet Salomon Bananyas dat hi Semey dootslaen soude. Ende Bananyas dede also ende versloech Semey.