Noordnederlandse Historiebijbel

3 capittel

Doe Salomon in dat conincrijc gevesticht was, doe wort hem gegeven des conincs Pharons dochter van Egipten. Ende daer woende hi mede in Jherusalem, ter tijt toe dat

[fol. 151vb]

dien tempel ende sijn huys ghemaect was. Ende Salomon hadde een kint eer hi 11 jaer out was.

Ende Salomon hielt die wet Gods ende wanderde in den wech die hem sijn vader bevolen hadde. Ende doe vergaderde Salomon sijn princen, sijn heren ende sijn gesin, ende toech in Gabaon, daer noch die tabarnakel was die Moyses dede maken. Ende hi dede daer sijn offerhande op dat coperen outaer dat Moyses dede maken. Ende hi offerde meer dan dusent beesten. Ende des nachts doe openbaerde God Salomon in sinen slaep ende seide: "Bidt van Mi wat gi wilt; Ic selt u geven."

Doe seide Salomon: "Here God, Gi hebt minen vader David grote ontfermherticheit gedaen, omdat hi voer U wanderde in der waerheit ende in der rechtvaerdicheit mit rechter herten tot U. Ende Gi hebt my hem gegeven tot enen soen. Ende Gi hebt mi geset te regneren voer David, minen vader. Ende ic ben noch een cleyn kint. Ende ic en weet noch minen inganc noch minen uutganc niet. Ende Gi hebt uwen knecht geset midden onder dat volc dat Gi vercoren hebt, dat ontallic is ende veel is. Daerom bid ic: geeft uwen knecht een leerlic hert ende wijsheit, opdat ic recht ende oerdel mach doen over u volc. Ende geeft mi verstant ende ondersceit te kennen ende te ondersceiden dat guede voir dat quade, want des volcs is seer voel te

[fol. 152ra]

berechten."

Ende die bede die Salomon bat, die behagede God wel. Ende God seide tot Salomon: "Omdat gi om wijsheit gebeden hebt ende niet en baet om lange te leven, noch om rijcheit, noch om uwer vianden doot, mer om ondersceit te verstaen tusscen guet ende quaet u volc te regieren, siet, so sal Ic u geven na uwer herten ende begheren wijsheit ende verstant also voel dat nyement voir u die wijsheit en hevet gehadt, noch nymmermeer mensche die wijsheit na u hebben en sel. Ende van dat gi niet gebeden en hebt, als rijcheit ende eer der werelt, so geve Ic u die rijcheit ende eer deser werelt ende mogentheit die nye mensche voir u en hadde, noch nymmermeer mensche na u hebben en sel. Est dat gi wandert in minen wege ende bewaert mine wet, ende mine geboden hout gelijc dat u vader gedaen heeft, so sel Ic u lange leven geven."

Doe wort Salomon ontwaec. Ende hi verstont den droem ende toech doe weder mit sinen volc te Jherusalem ende ghinc voir die arcke Gods ende offerde daer voel offerhande. Ende hi maecte doe een groet convivium, een maeltijt, mit al sijn princen, heren ende gesin.

Ende daer Salomon noch over tafel sat mit sinen heren, doe quamen daer 2 gemeenwiven ende stonden voir den coninc. Ende dat een wijf seide: "Here coninc, ic bid u, doet ons recht.

[fol. 152rb]

Dit wijf ende ic die wonen tesamen in een huys. Ende ic creech daer in den huse een kint. Ende op den dorden dach daerna doe creech dit wijf een kint. Ende daer en woende nyement in dat huys dan wi twee. Ende dit wijf heeft in der nacht haer kint verlegen. Ende si is heymelic opgestaen ende nam mijn kint van mijnre side, doe ic sliep. Ende haer dode kint dat leide si bi my. Ende des morgens doe ic mijn kint sugen soude geven, doe vernam ic dat dat kint doot was. Ende doet claer dach was, doe vernam ic dat dat dode kint mi niet en was." Doe seide dat ander wijf: "Here coninc, ten is also niet. Haer kint is doot ende mijn kint leeft." Doe seide dat eerste wijf: "Gi liecht daeran. Mijn kint leeft ende u kint is doot." Doe seide coninc Salomon: "Dit wijf seit: `Mijn kint leeft ende u kint is doot,' ende dat ander wijf seit: `Ten is also niet. Mer u kint is doot ende mijn kint leeft.'" Doe seide Salomon: "Haelt my een swaert." Doe men dat swaert brocht voir den coninc, doe seide hi: "Deelt dat levende kint an tween delen. Ende geeft dat een deel der eenre vrouwen ende dat ander deel der ander vrouwen." Doe was die vrouwe beroert des dat levende kint was, ende seide: "Here coninc,

[fol. 152va]

ic bid u: Geeft dat levende kint dier vrouwen ende en doetet niet." Dat ander wijf riep daerjegen ende seide: "Neen! Ten sel u noch mijn wesen! Mer latet delen, also alst die coninc geseit heeft." Doe seide coninc Salomon: "Geeft dat levende kint dier vrouwen ende en doetet niet, want si is die moeder. Ende die ander vrouwe is moeder van dat dode kint." Doe die princen ende heren dat wonnes hoerden van den coninc, doe ontsagen si den coninc om sijnre wijsheit willen, want die wijsheit Gods die was in hem om recht te doen over dat volc.