Noordnederlandse Historiebijbel

Hier beghint dat Dorde boec der Coninghen

Dat eerste capittel

Doe ontboet David alle sijn princen ende sijn heren ende sinen raet bi hem ende oec Salomon, sinen soen. Ende hi seide tot Salomon voir al dat volc: "Salomon, lieve kint. Ic hadde wille ende begheert God een huys, een tempel, te maken. Mer God dede mi te weten dat Hi dat huys niet en woude van my gemaect hebben, omdat ic een man van striden was ende ic voel bloets gestort hadde. Mer Hi seide dat mijn jonge soen een man van rusten soude wesen; die soude Hem een tempel tymmeren. Ende gelijc dat mi God nam uten acker die joncste van alle mine bruederen ende maecte mi here over al Ysrahel, also sel Salomon, mijn jonghe soen, na my here wesen ende besitten mijn rijc na my, est dat hi die wet Gods ende die geboden Gods hout. Ende tot deser steden ende op desen berch sel gi den tempel maken."

Voert seide David tot Salomon ende tot dien heren die bi hem waren hoe dat hi vergadert hadde gout, sulver, coper, yser,

[fol. 149rb]

steen ende hout om den tempel te maken daermede. Ende oec gaf David Salomon enen brief hoe menich cubitus den tempel lanc, breet, hoech ende wijt soude wesen. Ende oec gaf hi hem alle die manyer van dat maecsel in scrift ende wijsde hem waer dat gout ende ander guet was, daer hijt of tymmeren soude.

Doe coninc David out wort, doe en conde hi hem niet verwarmen des nachts, hoevoel dat men hem decte. Doe seiden sijn dienres: "Laet ons om een scoen maget sien die bi den coninc slapen mach, opdat si hem verwarmen mach." Doe vonden si een scoen maecht, die was genoemt Abysag; die diende den coninc ende sliep des nachts bi hem ende verwarmde hem. Mer si bleef maecht van hem. Ende si was sijn getrouwede coninginne.

Adonyas was coninc Davids outste soen die hi doe hadde. Doe sijn vader so out wort, doe docht hi dat hi dat rijc na sijn vader besitten soude. Ende hi dede maken een coninclike wagen ende vergaderde voel heren te paerde ende vijftich mannen die voer hem te voet ghingen. Ende dat wort David geseit. Mer hi en beruspede Adonyas daer niet of, want hi was die ander soen na Absolon ende was seer scoen van vormen. Ende dat Adonyas dede, dat dede hi bi rade van

[fol. 149va]

Joab ende van den priester Abyather; die holpen hem daertoe. Doe si hem coninc gecoren hadden, doe offerde hi grote offerhande van beesten ende van ander juweelen ende maecte doe in sijn hof een grote worscap ende bat daertoe sijn bruederen, des conincs kinderen, ende somme van des conincs gesin. Mer Nathan, Bananyas, Sadoch, Semey, Crethy, Felety ende Salomon, sijn brueder, die en bat hi niet ter maeltijt.

Doe seide Nathan, die propheet, tot Barsabee, Salomons moeder: "Hebt gi niet gehoert hoe Adonyas coninc gecoren is? Doet minen raet ende gaet totten coninc ende segt hem: `Here coninc, en heb gi niet uwen dienstmaecht gesworen dat Salomon, u soen, na u soude regneren ende op uwen stoel der mogentheit sitten? Ende Adonyas is coninc gecoren. Ende als gi also voel mitten coninc spreect, so sel ic tot u comen ende vervollen u woerden.'" Doe ghinc Barsabee tot coninc David in sijn slaepcamer. Ende Abysag was bi hem ende diende hem. Ende Barsabee viel op haer knyen ende gruetede hem ende bat hem of hi haer horen woude. Doe seide David: "Segt u begeren." Doe seide Barsabee: "Here coninc, gi hebt uwen dierne gesworen dat Salomon, u soen, na u in u rijc soude regneren ende

[fol. 149vb]

sitten op den stoel uwer mogentheit. Ende siet, Adonyas is coninc gecoren. Ende hi heeft een groet worscap gemaect ende heeft daertoe gebeden al uwe kinderen ende Abyather, den priester, ende Joab. Mer Salomon, u soen, en is daer niet gebeden. Daerom, here coninc, voirsiet dat wie gi coninc settet in uwe stede, eer dat gi sterft. Want blijft Adonyas, so sel Salomon ende ic verdreven worden. Doe Barsabee sprac dus mitten coninc, doe quam Nathan, die propheet, in die camer ende viel den coninc te voet ende seide: "Here coninc, hebt gi Adonyas daertoe vercoren coninc na u te wesen? Hi is huden gecroent. Ende hi heeft geoffert ossen ende voel scapen. Ende hi heeft al u kinderen ter worscap genoet ende voel van uwen princen ende oec den priester Abyather. Si eten ende si drinken ende si eren den coninc Adonyas. Mer Sadoch, den priester, Bananyas, Salomon, u soen, noch my en hebben si niet ter worscap gebeden. Here coninc, is dat bi uwen wille gesciet? Waerom en segt gi my dat niet, wie u rijc na u besitten soude?"

Doe seide David: "Laet Barsabee voir my comen." Doe Barsabee voer den coninc stont, doe seide hi: "Leeft God, die Here, die my bescermt heeft van allen anxt, Barsabee, gelijc dat ic u gesworen hebbe, so sel Salomon, u soen, na my regneren. Ende dat sel hi huden beghinnen." Doe viel Barsabee

[fol. 150ra]

op haren knyen ende dancte den coninc daerof ende seide: "Here coninc, God die doe u leven in ewicheit." Doe seide David: "Laet Sadoch, den priester, tot mi comen ende die propheet Nathan ende Bananyas." Doe si voer den coninc stonden, doe seide hi: "Neemt Salomon, mijn soen, ende set hem op mijn muyl ende voert hem in Gyon. Ende Sadoch ende Nathan die sellen hem daer coninc salven over al Ysrahel. Ende hi sel dat rijc na mi besitten." Doe seide Bananyas: "Amen. Dat moet waer wesen. Ghelijc dat God, die Here, geweest heeft mit David, also moet Hi nu wesen mit Salomon ende moet hem verheffen in des conincs mogentheit."

Doe ghingen die overste van Davids gesin, als Sadoch, den priester, Nathan, die propheet, Bananyas, Crethy ende Felety. Ende si setteden Salomon op des conincs muyl ende voerden hem mit des conincs gesin in Gyon. Aldaer nam Sadoch, die priester, een horen mit oly uut der tabarnakel ende salfde Salomon coninc. Ende doe blies men die trompetten. Ende dat gemeen volc seide: "God verleen Salomon, onsen coninc, lange leven." Ende dat gemeen volc volchden hem na. Ende si songen ende si waren seer verblijt. Ende si maecten een groet geruft.

Ende dat hoerde Adonyas ende diegene die mit hem waren ende aten. Doe seide Joab: "Wat beduyt dat trompet ende dat geruft in die

[fol. 150rb]

stede?" Doe seide Adonyas tot Jonathas, Abyathers soen: "Gaet ende verneemt wat dat roer beduyt ende brenct ons guede boetscap." Doe seide Jonathas: "Coninc David die heeft Salomon coninc geset. Ende Sadoch, die priester, ende Nathan, die propheet, Bananyas, Crethy ende Felety die hebben Salomon op des conincs muyl geset. Ende Sadoch ende Nathan die hebben Salomon coninc gesalvet in Gyon. Ende nu comen si mit blijscap in der steden. Dat is dat geluyt dat gi hoert." Doe Adonyas die maer verhoerde, doe was hi vervaert ende stont op van sijn maeltijt ende alle die mit hem aten. Ende een ygelic ghinc tot sinen huse.

Ende Adonyas was vervaert voer Salomon. Ende hi ghinc an die tabarnakel staen an den hoec van den outaer. Doe quam coninc Davids gesin mit Salomon voer hem ende seiden: "God die maec Salomons naem groet als uwen naem." Ende David anbat God aldaer hi lach in sijn bedde ende seide: "Ghebenedijt si God van Ysrahel, die Salomon, mijn soen, huden geset heeft in die stoel mijnre mogentheit voir mijn ogen."

Ende doe wort Salomon geboetscapt dat Adonyas van vresen voer hem

[fol. 150va]

in die tabarnakel gelopen was ende stont an den hoec van den outaer ende seide, hi en soude niet vandaen gaen, ten waer dat Salomon swoer dat hi hem niet doden en soude. Doe seide Salomon: "Est dat Adonyas guet voirheeft, daer en sel nyet een haer van sinen hoefde tenietgaen. Mer wort quaet onder hem gevonden, so moet hi sterven." Doe seinde Salomon om Adonyas. Ende Adonyas quam voer Salomon ende viel hem te voet ende bat genade. Ende Salomon dede hem graci ende seide: "Gaet mit vreden in u huys."