Noordnederlandse Historiebijbel

23 capittel

Doe David mit rusten sat in die stoel sijnre mogentheit, doe maecte hi voel psalmen uut ingeven des heiligen Geests, want hi propheteerde van der Passien ons Heren ende van der vangenisse der joden in Babylonyen ende voel meer ander prophecien, ende sonderlinge die psalmen daer hi in bescrijft die manyer van den bescouwenden leven. Oec maecte David doe menich instrument van snaerspelen.

Ende David die hadde uutvercoren uut die mannen van Ysrahel 36 die starcste, die men vant, die sijn lijf bewaerden dach ende nacht. Ende uut die 36 wasser ses vercoren, die starcste. Uut die ses waren 3 die starcste uutvercoren. Die eerste hiet Jonathas ende was Davids brueder soen die menich hondert Filisteen versloech. Die ander hiet Eleazar ende was Davids oems soen. Die hadde op een tijt so langhe gevochten jegen die Filisteen, sodat hi in lange tijt sijn hant niet en mocht rechten van den swaerde. Die dorde hiet Semeya; die stont op een tijt ende vacht al\leen

[fol. 146vb]

jegen die Filisteen. Ende die van Ysrahel die waren gevlogen. Mer doe si hem sagen alleen vechten, doe quamen si weder bi hem. Dat vierde dat was Abysay, Davids suster soen. Die versloech oec menich hondert Philisteen doot. Die vijfte hiet Bananyas. Die versloech een lybaert ende menich stercke heydenen. Die seste hiet Sobocay. Die versloech een rose ende voel ander Philisteen. Die sesse waren van der meester craften.

Op een tijt doe lagen die Philisteen te velde tusschen Jherusalem ende Bethleem. Ende David die lach in die spelunc te Medollam. Ende die Philisteen lagen in den dale. Doe begheerde David van dat water te drincken uut die fonteyn van Bethleem ende seide: "Wye sel my berechten van dat soete water der fonteynen van Bethleem?" Dat verhoerden drie van die ses stercste die bi hem waren, als Abysay, Bananyas ende Sobocay. Ende si ghingen al vechtende doir die Filisteen. Ende si haelden dat water uut die fonteyne van Bethleem. Ende al vechtende quamen si weder doer die Filisteen ende brochten David dat water. Doe vraechde David hoe si an dat water quamen. Doe seiden die drie mannen dat sijt al vechtende gehaelt hadden. Doe seide David: "Ic danc u seer, mer ic en wil den anxt van uwen live niet drinken." Ende David goet dat wa\ter

[fol. 147ra]

op enen steen God tot eenre sacrificien ende hi en drancs niet.

Die ses voirgenoemt dat waren die stercste die bi David waren. Ende David was selve enen van den alrenstarcsten in den strijt, ende over die verwonnen waren die genadichste, ende onder sijn gesin die guedertierenste. Ende voert so sijn dit die ander 30 stercke die bi David waren, als Asael, Semma, Helisacha, Heras, Hyra, Abyeser, Mebonnay, Selinon, Macharay, Elyud, Hythay, Banay, Heday, Abyalbon, Anazabeth, Helyaba, Hayam, Helypheleth, Helyam, Esray, Pharay, Ygaal, Bonny, Zelech, Naaray, Garabi, Uryas, Eleazar, Semma, Hyra. Dat sijn die stercste die David bi hem hadde.