Noordnederlandse Historiebijbel
(1998)–Anoniem Noordnederlandse Historiebijbel–
Auteursrechtelijk beschermd
[Folio 145ra]
| |
bloet van den Gabonyten gestort hadde." Doe riep die coninc die Gabonyten ende seide: "Gi en sijt niet van die kinder van Ysrahel." Doe seiden si: "Die van Ysrahel swoeren, si en souden hem niet misdoen ende Saul versloechse." Doe seide David tot die van Gabaon: "Wat is u begeren?" Doe seiden die van Gabaon: "Wi en begeren gout noch sulver, mer ons begeert is jegen Saul ende jegen sijn huusgesin." Doe seide David: "Wat wil gi dat ic u doe?" Doe seiden die van Gabaon: "Saul die heeft ons bedruct ende verdriet angedaen. Also sellen wi den sinen doen. Geeft ons seven mannen van sinen kinderen, opdat wise crucen mogen in Gabaoth." Doe seide David: "Ic selse u geven." David die spaerde Myfiboseth om Jonathas sijns vaders willen. Ende hi gaf die van Gabaon twee van Sauls kinderen. Ende haer moeder hiete Respha ende was Sauls biwijf. Ende doe gaf hi hem vijf van Sauls dochter kinderen Merab. Ende die van Gabaon cruystense in den beghin van den oest. Ende doe nam Respha een cleet ende decte haer kinder, dat daer geen regen op en viel ende datse die vogelen des daechs niet en aten noch die beesten des nachts. Doe wort dat David geseit, wat Respha dede. Doe dede David Sauls gebeent ende Jonathas gebeent halen van Jabes uut Galaad ende dede nemen die daer gehangen waren ende deedse mit Sauls | |
[Folio 145rb]
| |
gebeent begraven in sijns vaders graf. Ende doe verrees daer een strijt jegen die van Ysrahel. Ende David die toech uut mit sinen gesin ende vacht daer jegen die Filisteen. Ende daer was een rose, Golyaths brueder, die hiet Yesbidenob. Dat yser van sinen speer woech 300 uncen. Ende hi hadde gegort een nyeu swaert ende vacht doer dat volc ende vreesde den coninc David. Mer Abysay die scoet voir David ende versloech den rose. Doe swoeren die princen van Ysrahel dat David niet meer mit hem te stride soude gaen, opdat hi niet verslegen en worde. Daerna doe hadden die van Ysrahel een strijt in Gob jegen die Philisteen. Ende een ridder, hiet Sobocay, die versloech daer een rose, hiet Sephei, ende was oec Golyaths brueder. Dordewerven doe was daer noch een strijt in Geth. Ende daer was noch een rose ende was oec Golyaths brueder. Die versloech Jonathas, Davids brueder soen. Ende den vierden rose versloech David; dat was Golyath. Arapha die brocht 4 rosen ter werelt ende worden van David ende van den sinen versleghen. |
|