Noordnederlandse Historiebijbel

12 capittel

Doe seide Samuel tot dat gemeen volc van Ysrahel: "Ic heb u woerden gehoert, die gi tot mi gesproken hebt. Ic heb u enen coninc geset die u voergaen sel. Ende ic worde nu out, mer mijn kinderen die sijn mit u. Ende ic heb mit u geweest van mijn joncheit tot nu toe. Ende ic spreec nu van miselven voir God ende voer sijn gesalfde dat ic nie een os of een ezel van u genomen hebbe of yet bedruct hebbe." Doe seiden die kinder van Ysrahel: "Gi en hebt ons niet bedruct noch gene giften van nyement genomen." Doe seide Samuel: "Daer wees God een getuuch of."

Voirt seide Samuel: "God die scicte Moyses ende Aaron, dat si u voervaders leden uut Egipten ende heeftse hier int lant gebrocht. Ende si lieten den almachtigen God after. Doe gafse God in den handen Sysare ende daerna in den handen der Philisteen. Daerna doe riepen si an God ende seiden: `Wy hebben gesondicht. Wi hebben Baal ende Astraoth gedient, mer wi bidden U: bescermt ons van onsen vianden.' Ende doe bescermde Hi u. Ende hoe

[fol. 115rb]

wel u God regierde, gi wout enen coninc hebben.

Ende God gaf u enen coninc. Mer ist dat gi ende uwen coninc God dient, Hi sel u wel bewaeren. Mer versmagi God ende sijn geboden, so sel die hant Gods al op u wesen.

Ende siet nu een groet dinc dat God gedaen heeft voir uwen ogen. Gi en hebt van droechte genen taruwe gemaeyt. Ic sel God anbidden ende Hi sel u regen verlenen. Ende weet dat gi groet quaet voer God gedaen hebt, omdat gi om enen coninc baet." Doe bat Samuel an Gode ende God gaf hem regen in dien dage. Doe ontsach alt volc God ende Samuel. Ende doe seide al dat gemeen volc tot Samuel: "Bidt God voer u knechten, opdat si niet en sterven. Wi hebben sonde gedaen, omdat wi baden om enen coninc."

Doe seide Samuel tot den volc: "En wilt niet vervaert wesen, mer dient God uut al uwer herten. Ende en wilt geen ydel afgoden anbeden, want God heeft u vercoren tot sinen volc. Ende ic sel voer u bidden ende leren u enen gueden, rechten wech tot Gode. Daerom so ontsiet God ende dient Hem waerachtelic uut al uwer herten, want gi hebt sijn mogentheit gesien dat Hi onder u ge\daen

[fol. 115va]

heeft. Daerom, ist dat gi verhert in quaetheit, u coninc ende gi selt tesamen vergaen."